ନୂଆଦିଲ୍ଲୀ: ଅଷ୍ଟ୍ରେଲିଆ ମାଟିରେ ବିଜୟର ଲହର ଖେଳାଇଲେ ଭାରତୀୟ ଖେଳାଳି । ପର୍ଥ ଷ୍ଟାଡିୟମରେ ଚାଲିଥିବା ବର୍ଡର-ଗାଭାସ୍କର ଟ୍ରଫିରେ ଭାରତ ନିଜର ଦମଦାର ପ୍ରଦର୍ଶନ କରିଛି । ବ୍ୟାଟ୍ସମ୍ୟାନଙ୍କ ବ୍ୟାଟିଂ ଯାଦୁ ପରେ ଭାରତୀୟ ବୋଲର ଟିମ ମଧ୍ୟ ବିଜୟର ଧାରାକୁ ସରଳ କରିଦେଇଥିଲା । ଭାରତ-ଅଷ୍ଟ୍ରେଲିଆ ପ୍ରଥମ ଟେଷ୍ଟ ମ୍ୟାଚ୍ରେ ଟିମ୍ ଇଣ୍ଡିଆର ବଡ ବିଜୟ ସହ ଅଷ୍ଟ୍ରେଲିଆକୁ ୨୯୫ ରନ୍ରେ ହରାଇଲା ଭାରତ ।
ବ୍ୟାଟରଙ୍କ ପରେ ବୁମ୍ରା, ସିରାଜ, ହର୍ଷିତଙ୍କ ଚମତ୍କାର ପ୍ରଦର୍ଶନ ଦେଖିବାକୁ ମିଳିଛି । ୨ୟ ପାଳିରେ ଅଷ୍ଟ୍ରେଲିଆ ୨୩୮ରେ ଅଲଆଉଟ୍ ହୋଇଛି । ବୁମରା ଓ ସିରାଜ୍ଙ୍କୁ ୩ଟି ଲେଖାଏଁ ୱିକେଟ୍ ମିଳିଥିବା ବେଳେ ସୁନ୍ଦରଙ୍କୁ ୨, ରାଣା ଓ ରେଡ୍ଡୀଙ୍କୁ ଗୋଟିଏ ଲେଖାଏଁ ୱିକେଟ୍ ମିଳିଛି । ୫ ମ୍ୟାଚ୍ ବିଶିଷ୍ଟ ସିରିଜରେ ଭାରତ୧-୦ରେ ଆଗୁଆ ରହିଛି । ଭାରତ ସ୍କୋର ୧୫୦ ଓ ୪୮୭/୬ (ପାଳି ଘୋଷଣା)। ସେହିପରି ଅଷ୍ଟ୍ରେଲିଆର ସ୍କୋର ୧୦୪ ଓ ୨୩୮ । ପର୍ଥରେ ଭାରତର ଏହା ୨ୟ ଟେଷ୍ଟ ବିଜୟ ।
ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ପାଞ୍ଚ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ପ୍ରଥମ ମ୍ୟାଚ୍ ପର୍ଥରେ ଖେଳାଯାଇଥିଲା। ଏହି ସିରିଜ୍ ଉଭୟ ଦଳ ପାଇଁ ଗୁରୁତ୍ୱପୂର୍ଣ୍ଣ ଏବଂ କେଉଁ ଦଳ ବିଶ୍ୱ ଟେଷ୍ଟ ଚାମ୍ପିଅନସିପ୍ ଫାଇନାଲରେ ପହଞ୍ଚିବ ତାହା ସ୍ପଷ୍ଟ ହୋଇଯିବ। ଭାରତୀୟ ଅଧିନାୟକ ଜସପ୍ରୀତ ବୁମ୍ରା ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ। ଅଷ୍ଟ୍ରେଲିଆ ପାଇଁ ଭାରତ ୫୩୪ ରନ୍ ଲକ୍ଷ୍ୟ ଧାର୍ୟ୍ୟ କରିଥିଲା। ଏହାର ଜବାବରେ ଅଷ୍ଟ୍ରେଲିଆ ଦଳ ୨୩୮ରନରେ ସୀମିତ ରହିଥିଲା।
