ଭୁବନେଶ୍ୱର: ବିରୋଧୀ କହୁଛନ୍ତି ଚାଲିଛି ସବୁ ଗଡ଼ବଡ଼ । ଶାସକ କହୁଛନ୍ତି ସବୁ କିଛି ଠିକ ଚାଲିଛି । ବିଗୁଡୁଥିବା ଆଇନ ବ୍ୟବସ୍ଥାକୁ ନେଇ ଯେଉଁଠି ରାଜ୍ୟ ରାଜନୀତି ହୁଲୁସ୍ତୁଲ ହୋଇଉଠିଲାଣି ସେଠି ଭିନ୍ନ ବୟାନବାଜି ଦେଖିବାକୁ ମିଳିଛି । ଉଭୟ ବିରୋଧୀ ବିଜେଡି ଓ କଂଗ୍ରେସ ପ୍ରେସ ମିଟ କରି ରାଜ୍ୟ ସରକାରଙ୍କ ଉପରେ ଖୁବ ବର୍ଷିଛନ୍ତି । ବିଜେଡି ପକ୍ଷରୁ ବରିଷ୍ଠ ନେତା ତଥା ବିଧାୟକ ପ୍ରସନ୍ନ ଆଚାର୍ଯ୍ୟ ପ୍ରେସ ମିଟ କରି କହିଥିଲେ ଯେ, ରାଜ୍ୟରେ ଆଇନ ଶୃଙ୍ଖଳା ବିପର୍ଯ୍ୟସ୍ତ । ସେପଟେ କଂଗ୍ରେସ ମଧ୍ୟ ନିଜ ପୁରୁଣା ଦାବିକୁ ଉଠାଇ ଆସିଛି । ସାମ୍ବାଦିକ ସମ୍ମିଳନୀ କରି ରାମଚନ୍ଦ୍ର କାଡାମ ପ୍ରଶ୍ନ ଉଠାଇଛନ୍ତି । କିନ୍ତୁ ଶାସକ ଦଳ ଏହାକୁ ସମ୍ପୂର୍ଣ୍ଣ ଖଣ୍ଡନ କରିଛି । ବିଜେପି କହିଛି ଯେ ଆଗ ଅପେକ୍ଷା ନାରୀ ନିର୍ଯାତନାର ମାତ୍ରା କମିଛି । ବିରୋଧୀ ଯାହା ଅଭିଯୋଗ ଲଗାଉଛନ୍ତି ତାହା ସମ୍ପୂର୍ଣ୍ଣ ମିଛ । ଯାହାକୁ ନେଇ ଏବେ ଦେଖାଦେଇଛି ଅସନ୍ତୋଷ । କିନ୍ତୁ ଏଠି ପ୍ରଶ୍ନ ଉଠୁଛି ଯେ କିଏ କହୁଛି ସତ? ଯଦି ଶାସକ ଦଳ କହୁଥିବା କଥା ଠିକ, ତେବେ ରାଜ୍ୟରେ ବର୍ତ୍ତମାନ ଚାଲିଥିବା ସ୍ଥିତି ଉପୁଜିଲା କ’ଣ ପାଇଁ?
