ଭୁବନେଶ୍ୱର: ଏପ୍ରିଲ ୨, ବୁଧବାର । ସମୟ ସାଢେ ୧୦ । ସବୁଦିନ ଭଳି ଆରମ୍ଭ ହୋଇଥିଲା ବିଧାନସଭା । ସୁରୁଖୁରୁରେ ଚାଲିଥିଲା ଗୃହ । ପ୍ରଶ୍ନକାଳ, ଶୁନ୍ୟକାଳ ଓ ମୁଲତବୀ ପ୍ରସ୍ତାବ ଉପରେ ସ୍ୱଭାବିକ ହୋଇଥିଲା ଆଲୋଚନା । ପରେ ଅପରାହ୍ନ ୪ଟାରେ ଉପସ୍ଥାପନ ହୋଇଥିଲା ଏକ ଗୁରୁତ୍ୱପୂର୍ଣ୍ଣ ବିଲ୍ । ବିଶ୍ୱବିଦ୍ୟାଳୟ ସଂଶୋଧନ ବିଲ ଗୃହୀତ କରିଥିଲେ ଉଚ୍ଚଶିକ୍ଷା ମନ୍ତ୍ରୀ ସୂର୍ୟ୍ୟବଂଶୀ ସୂରଜ । ତେବେ ନିୟମ ଅନୁସାରେ ରାତି ୯ଟା ଯାଏ ଚାଲିପାରିବ ଗୃହକାର୍ୟ୍ୟ । କିନ୍ତୁ ସମୟ ଗଡିଥିଲା ହେଲେ ସରିନଥିଲା ବିଧାନସଭା । ଆଉ ସ୍ୱତନ୍ତ୍ର ମୋସନ ଜରିଆରେ ଦିନକ ପାଇଁ ବୃଦ୍ଧି କରିଥିଲେ ବାଚସ୍ଫତି । ଏହାପରେ ରାତିସାରା ଚାଲିଥିଲା ବିଧାନସଭା । ଘଂଟାଘଂଟା ଧରି ଚାଲିଥିଲା ଆଲୋଚନା । ଶେଷ ଦିନରେ ଅପରାହ୍ନ ୪ଟାରୁ ୪ଟା ୩୦ ସାଢେ ୧୨ଘଂଟା ପର୍ୟ୍ୟନ୍ତ ଜୋରଦାର ବିତର୍କ ହୋଇଥିଲା । ଶେଷରେ ପାରିତ ହୋଇଥିଲା ଦୁଇ ଦୁଇଟି ଗୁରୁତ୍ୱପୂର୍ଣ୍ଣ ବିଲ୍ । ତେବେ ଏ ସମସ୍ତ କାର୍ୟ୍ୟ ସୃଷ୍ଟି କରିଥିଲା ଏକ ବିରଳ ରେକର୍ଡ ।
ଏହା ବିଧାନସଭା ଇତିହାସର ରେକର୍ଡ ସ୍ତରୀୟ କାର୍ୟ୍ୟକାଳ । ୨୨ବର୍ଷ ପରେ ହୋଇଛି ଇତିହାସର ପୁନରାବୃତି । ୧୯୯୯ ଓ ୨୦୦୩ରେ ବିଧାନସଭା ଚାଲିଥିଲା ରାତି ସାରା । ପ୍ରାୟ ଦୁଇ ଦଶନ୍ଧି ପରେ ଗତକାଲିଠୁ ଆଜି ସକାଳ ଯାଏଁ ରାତିତମାମ ଚାଲିଲା ବିଧାନସଭା । ଶେଷ ଯାଏଁ ଉପସ୍ଥିତ ଥିଲେ ୧୪ମନ୍ତ୍ରୀ ଓ ଶତାଧିକ ବିଧାୟକ । ମୁଖ୍ୟମନ୍ତ୍ରୀ ମୋହନ ମାଝୀ, ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା, ଦୁଇ ମହିଳା ବିଧାୟିକା ଉପାସନା ମହାପାତ୍ର ଏବଂ ସଞ୍ଜଳି ମୁର୍ମୁଙ୍କ ସମେତ ଅନେକ ବିଧାୟକ ସାମିଲ ହୋଇଥିଲେ । ସେହିପରି ବିରୋଧୀ ଦଳ ପକ୍ଷରୁ ବରିଷ୍ଠ ବିଧାୟକ ରଣେନ୍ଦ୍ର ପ୍ରତାପ ସ୍ୱାଇଁ, ଅରୁଣ ସାହୁ, ଗଣେଶ୍ବର ବେହେରା, ଧ୍ରୁବ ସାହୁ ବିଲ୍ ବିରୋଧରେ ବଳିଷ୍ଠ ଯୁକ୍ତି ବଢିଥିଲେ । ଉଚ୍ଚ ଶିକ୍ଷା ମନ୍ତ୍ରୀ ସୂର୍ୟ୍ୟବଂଶୀ ସୂରଜ ମଧ୍ୟ ବିରୋଧୀଙ୍କୁ କଡ଼ା କାଉଣ୍ଟର କରିଥିଲେ । ଏସବୁ ଭିତରେ ଶେଷ ହୋଇଥିଲା ସପ୍ତଦଶ ବିଧାନସଭାର ତୃତୀୟ ଅଧିବେଶନ ତଥା ବଜେଟ୍ ଅଧିବେଶନ । ୨୮ଟି କାର୍ୟ୍ୟ ଦିବସ ମଧ୍ୟରୁ ୨୫ଟି କାର୍ୟ୍ୟ ଦିବସ ଚାଲିଥିଲା । ୩ଟି କାର୍ୟ୍ୟ ଦିବସ ପୂର୍ବରୁ ଅନିର୍ଦ୍ଦିଷ୍ଟ କାଳ ପାଇଁ ବିଧାନସଭାକୁ ମୁଲତବୀ ଘୋଷଣା କରିଛନ୍ତି ବାଚସ୍ପତି ।
