ଭୁବନେଶ୍ୱର: ବିଜେପି ଆୟୋଜନ କରୁଛି ସ୍ୱତନ୍ତ୍ର କାର୍ଯ୍ୟକ୍ରମ । ଯେଉଁଠି ଏକାଠି ଖାଇବେ ସମସ୍ତ ନେତା କର୍ମୀ । ରବିବାର ଠାରୁ ୨ ଦିନ ଧରି ଚାଲିବାକୁ ଥିବା ଏହି କାର୍ଯ୍ୟକ୍ରମ ପ୍ରତି ଗାଁରେ ଅନୁଷ୍ଠିତ ହେବ । ଯେଉଁଥରେ ଘରୁ ଖାଇବା ଆଣି ଏକାଠି ଖାଇବେ ବିଜେପିର କର୍ମୀମାନେ । ଏଥିସହିତ ପ୍ରତି କାର୍ୟ୍ୟକର୍ତ୍ତା ନିଜ ନିଜ ଘରେ ଦଳୀୟ ପତାକା ଉଡାଇବେ । କାରଣ ଆସନ୍ତାକାଲି ହେଉଛି ବିଜେପିର ପ୍ରତିଷ୍ଠା ଦିବସ । ଆଉ ଖାସ୍ ଏଥିପାଇଁ ଏପରି ସ୍ୱତନ୍ତ୍ର ପଦକ୍ଷେପ ନିଆଯାଇଛି । ଏନେଇ ସୂଚନା ଦେଇଛନ୍ତି ବିଜେପି ରାଜ୍ୟ ସଭାପତି ମନମୋହନ ସାମଲ । ରବିବାର ରାମ ନବମୀ ଥିବାରୁ ଏଥର ଦୁଇ ଦିନ ପ୍ରତିଷ୍ଠା ଦିବସ ପାଳନ କରିବ ଦଳ । ତୃଣମୂଳରେ ସଙ୍ଗଠନକୁ ଅଧିକ ମଜଭୁତ କରିବା ପାଇଁ ବୁଥ୍ ସ୍ତରରୁ ପ୍ରତିଷ୍ଠା ଦିବସ ପାଳନ କରାଯିବ । ଏଥରେ ବରିଷ୍ଠ ନେତା ମାନେ ଯୋଗ ଦେବା ସହିତ ଦଳୀୟ କାର୍ୟ୍ୟକ୍ରମ ନେଇ ଆଲୋଚନା ହେବ ।
ତେଣୁ ସଦସ୍ୟ ମାନେ ନିଜ ଘରୁ ଖାଇବା ପ୍ରସ୍ତୁତ କରି ଆଣି ବୈଠକରେ ଏକାଠି ବସି ଖାଇବାକୁ ଅନୁରୋଧ କରାଯାଇଛି । ପ୍ରତି ବୁଥରୁ ଅତିକମରେ ୨୦୦ କର୍ମୀଙ୍କୁ ନେଇ ବୈଠକ କରିବାକୁ ଲକ୍ଷ୍ୟ ରଖିଛି ବିଜେପି । ଯେଉଁମାନେ ୬ ତାରିଖରେ ପ୍ରତିଷ୍ଠା ଦିବସ ପାଳନ କରି ନପାରିବେ ସେମାନେ ୭ ତାରିଖରେ ମଧ୍ୟ ପାଳନ କରିପାରିବେ । ସେହିପରି ରବିବାର ଠାରୁ ଆମ୍ବେଦକର ଜୟନ୍ତୀ ଯାଏଁ ଜନ ସଂପର୍କ କାର୍ୟ୍ୟକ୍ରମ ହେବ । କର୍ମକର୍ତ୍ତାମାନେ ଘରକୁ ଘର ବୁଲି ସରକାରଙ୍କ ଲୋକାଭିମୁଖୀ ଯୋଜନା ସମ୍ପର୍କରେ ଅବଗତ କରାଇବା ସହ ଜନ ସଂପର୍କ ସ୍ଥାପନା କରିବେ । ସେପଟେ ବିଜେଡିର ସାଙ୍ଗଠନିକ ନିର୍ବାଚନ ବୈଠକ ୭ ତାରିଖରେ ହେବାକୁ ଯାଉଛି । ଯେଉଁଥିରେ ଦଳର ସଙ୍ଗଠନ ସଜାଡିବା ଉପରେ ଗୁରୁତ୍ୱପୂର୍ଣ୍ଣ ଆଲୋଚନା ହେବ ନେଇ ଚର୍ଚ୍ଚା ହେଉଛି । ତେବେ ଏମିତି ପରିସ୍ଥିତିରେ ବିଜେପିର ଏହି ପଦକ୍ଷେପ ସାଧାରଣ ଲୋକ ଏବଂ ବିରୋଧୀ ଦଳଙ୍କ ଉପରେ କିଭଳି ପ୍ରଭାବ ପକାଉଛି ତାହା ଦେଖିବାକୁ ବାକି ରହିଲା ।
