ଭୁବନେଶ୍ୱର ୧୬/ଜୁଲାଇ : ବାଲେଶ୍ବର ଏଫଏମ ଛାତ୍ରୀ ସୌମ୍ୟାଶ୍ରୀଙ୍କ ମୃତ୍ୟୁକୁ ନେଇ ଓଡ଼ିଶାରେ ମହିଳା ସୁରକ୍ଷା ଓ ନ୍ୟାୟ ପ୍ରତି ଗଭୀର ପ୍ରଶ୍ନ ଉଠିଛି। ଏହି ମାମଲାରେ ଜଣେ ବିଭାଗୀୟ ମୁଖ୍ୟ (HOD) ଙ୍କ ବିରୁଦ୍ଧରେ ଯୌନ ନିର୍ଯାତନା ଦେଇ ଆତ୍ମହତ୍ୟା କରାଇବା ଅଭିଯୋଗ ଲାଗିଛି। ଏହା ପରେ ଅଖିଳ ଭାରତୀୟ ମହିଳା କଂଗ୍ରେସ ସଭାନେତ୍ରୀ ଅଳକା ଲାମ୍ବା ଓଡ଼ିଶା ସରକାରଙ୍କୁ ନିଶାନା କରି କହିଛନ୍ତି ଯେ ରାଜ୍ୟରେ ବ୍ୟବସ୍ଥା ସଂପୂର୍ଣ୍ଣ ଭାବେ ବିଫଳ ହୋଇଛି ଓ ନାରୀ ନିରାପତ୍ତା ପାଇଁ କୌଣସି ଗଂଭୀର ପଦକ୍ଷେପ ନିଆଯାଇ ନାହିଁ। ଏହି ପରିପ୍ରେକ୍ଷିତିରେ କଂଗ୍ରେସ ଗୁରୁବାର ଦିନ ଓଡ଼ିଶା ବନ୍ଦ ଓ ଆସନ୍ତା ୨୧ ତାରିଖରେ ସଂସଦ ଘେରାଉ କରିବା ଘୋଷଣା କରିଛି। ଅଳକା ଲାମ୍ବା ଘୋଷଣା କରିଛନ୍ତି ଯେ ଏହି ଘଟଣାକୁ ସଂସଦ ଅଧିବେଶନରେ ପ୍ରମୁଖ ମୁଦ୍ଦା ବନେଇ ରଖିବେ। ସେ ବାଲେଶ୍ବର ଗସ୍ତ କରି ସୌମ୍ୟାଶ୍ରୀଙ୍କ ପରିବାର ସହିତ ମିଳିବେ ବୋଲି ମଧ୍ୟ କହିଛନ୍ତି। ମହିଳା କଂଗ୍ରେସ ସଭାପତି ମୀନାକ୍ଷୀ ବାହିନିପତିଙ୍କ ନେତୃତ୍ୱରେ ବାଲେଶ୍ବରରେ ବିଶାଳ କର୍ମୀ ସମାବେଶ ଅନୁଷ୍ଠିତ ହେବାକୁ ଯାଉଛି ଯେଉଁଠାରେ ଅଳକା ଲାମ୍ବା ମଧ୍ୟ ଯୋଗ ଦେବେ। ଏହି ଘଟଣା ନେଇ ଓଡ଼ିଶାରେ ରାଜନୈତିକ ଉତ୍ତାପ ବଢ଼ି ଚାଲିଛି। ବିଧାୟିକା ସୋଫିଆ ଫିର୍ଦ୍ଦୋସ ଏହାକୁ ମହିଳା ନିରାପତ୍ତା ଉପରେ ଅସଂବେଦନଶୀଳ ରାଜ୍ୟ ସରକାରର ପ୍ରମାଣ ବୋଲି ଉଲ୍ଲେଖ କରିଛନ୍ତି। ଏହି ଆନ୍ଦୋଳନ ଓ ସଂସଦ ଘେରାଉ ଯୋଜନା ରାଜ୍ୟ ସରକାର ପାଇଁ ଗଭୀର ଚ୍ୟାଲେଞ୍ଜ ସୃଷ୍ଟି କରିପାରେ। ଏହି ଦ୍ୱାରା ଏକ ମାନବିକ ଓ ରାଜନୈତିକ ମୁଦ୍ଦା ଅନ୍ତର୍ଜାତୀୟ ସ୍ତରରେ ମଧ୍ୟ ଚର୍ଚ୍ଚାରେ ଆସିପାରିବ।
