ନୂଆଦିଲ୍ଲୀ ୨୨/ଜୁଲାଇ : ଭାରତର ଉପରାଷ୍ଟ୍ରପତି ଜଗଦୀପ ଧନଖର ୨୧ ଜୁଲାଇ ୨୦୨୫ରେ ହଠାତ୍ ଭାବରେ ତାଙ୍କ ପଦରୁ ଇସ୍ତଫା ଦେଇଥିଲେ। ଏହି ନିଷ୍ପତ୍ତି ସେ ତାଙ୍କ ସ୍ବାସ୍ଥ୍ୟ ସମସ୍ୟାକୁ ଦୃଷ୍ଟିରେ ରଖି ନେଇଥିଲେ। ତାଙ୍କ ଇସ୍ତଫା ପତ୍ରରେ ସେ ଲେଖିଥିଲେ ଯେ, ଡାକ୍ତରଙ୍କ ପରାମର୍ଶ ଅନୁଯାୟୀ ତାଙ୍କୁ ଚାପରୁ ଦୂରେଇ ରହିବା ଓ ସ୍ବାସ୍ଥ୍ୟକୁ ପ୍ରାଥମିକତା ଦେବା ଆବଶ୍ୟକ। ଗତ ମାର୍ଚ୍ଚରେ ତାଙ୍କୁ ଛାତିରେ ଯନ୍ତ୍ରଣା ହେବା ପରେ ଦିଲ୍ଲୀ AIIMS ହସ୍ପିଟାଲରେ ଭର୍ତ୍ତି କରାଯାଇଥିଲା ଓ ତାଙ୍କୁ CCU ରେ ରଖାଯାଇ ହୃଦରୋଗ ବିଶେଷଜ୍ଞମାନଙ୍କ ତତ୍ତ୍ୱାବଧାନରେ ଚିକିତ୍ସା କରାଯାଇଥିଲା। ସେ ସେତେବେଳେ ଠିକ ହେବା ସତ୍ତ୍ୱେ, ପରବର୍ତ୍ତୀ ସମୟରେ ସେ ଫେରି ଅସୁସ୍ଥ ହୋଇପଡ଼ିଥିଲେ। ଧନଖରଙ୍କ ସ୍ବାସ୍ଥ୍ୟ ସମସ୍ୟା ଗମ୍ଭୀର ଥିଲା ବୋଲି ଏକାଧିକ ସୂତ୍ର ଜଣାଇଛି। ତାଙ୍କୁ ହୃଦରୋଗ ସମସ୍ୟା ଥିବା ଏବଂ ଦୀର୍ଘମ୍ୟାଦୀ ଚିକିତ୍ସା ଚାଲିଥିବା କୁହାଯାଉଛି। ଏହି ଅସୁସ୍ଥତା ସହିତ ଉପରାଷ୍ଟ୍ରପତି ଭାବେ ଦାୟିତ୍ୱପୂର୍ଣ୍ଣ ଭୂମିକା ନିଭାଇବା ସମ୍ଭବ ନୁହେଁ ବୋଲି ଡାକ୍ତରମାନେ ମତ ଦେଇଥିଲେ। ତେଣୁ, ଧନଖର ଚାପ ହ୍ରାସ ପାଇଁ ଏବଂ ତାଙ୍କ ସ୍ବାସ୍ଥ୍ୟକୁ ଗୁରୁତ୍ୱ ଦେଇ ଏହି ନିଷ୍ପତ୍ତି ନେଇଥିଲେ। ତାଙ୍କ ପଦତ୍ୟାଗ ପରେ ସେ ରାଷ୍ଟ୍ରପତି ଦ୍ରୌପଦୀ ମୁର୍ମୁ, ପ୍ରଧାନମନ୍ତ୍ରୀ ମୋଦି ଓ ସଂସଦ ସଦସ୍ୟମାନଙ୍କୁ ସମର୍ଥନ ପାଇଁ କୃତଜ୍ଞତା ଜଣାଇଥିଲେ। ତାଙ୍କ ଇସ୍ତଫା ଦେଶର ରାଜନୈତିକ ଦୃଶ୍ୟପଟରେ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଆଣିଛି।
