କଟକ: କଟକରେ ହେବ ଚୌକା ଛକାର ବର୍ଷା । ବାରବାଟୀ ଷ୍ଟାଡିୟମରେ ଭାରତ-ଦକ୍ଷିଣ ଆଫ୍ରିକା ଟି -୨୦ ମ୍ୟାଚ ପାଇଁ ଆଉ ମଝିରେ ରହିଲା ତିନି ଦିନ । ପିଚ୍, ଗ୍ରାଉଣ୍ଡ ଓ ଷ୍ଟାଡିୟମ ପ୍ରସ୍ତୁତି ପ୍ରାୟତଃ ଚୁଡ଼ାନ୍ତ ହୋଇ ସାରିଲାଣି । ଆଜି ଦ୍ବିତୀୟ ଦିନ ପାଇଁ ଓସିଏ ଅନୁବନ୍ଧିତ ସଂଗଠନ ଗୁଡିକ ପାଇଁ ଟିକେଟ ବିକ୍ରି ଜାରି ରହିବ। ସେପଟେ ଆସନ୍ତାକାଲି ସାଧାରଣ ଦର୍ଶକଙ୍କ ପାଇଁ କାଉଣ୍ଟରରେ ଆରମ୍ଭ ହେବ ଟିକେଟ ବିକ୍ରି । ଏହା ପୂର୍ବରୁ ଆଜି ଟିକେଟ୍ କାଉଣ୍ଟର ବୁଲି ଦେଖିଛନ୍ତି କଟକ ଡିସିପି ପିନାକ୍ ମିଶ୍ର । ମୋଟ ୯ଟି କାଉଣ୍ଟରରେ ଟିକେଟ ବିକ୍ରି ହେବାକୁ ଥିବା ବେଳେ ୧୦ ପ୍ଲାଟୁନ ଫୋର୍ସ ମୁତୟନ ହେବେ । କଳାବଜାରି ଓ ବିଶୃଙ୍ଖଳାକୁ ରୋକିବା ପାଇଁ ପୋଲିସ କଡ଼ା ପଦକ୍ଷେପ ନେବ ।
ସେପଟେ ବାରବାଟୀ ମ୍ୟାଚ ପାଇଁ କମିସନରେଟ ପୋଲିସର ଆଉ ଏକ ସୁରକ୍ଷା ବୈଠକ ଅନୁଷ୍ଠିତ ହୋଇଯାଇଛି । OCA, ବିଭିନ୍ନ ହୋଟେଲ କର୍ତ୍ତୃପକ୍ଷ, ବିମାନବନ୍ଦର କର୍ତ୍ତୃପକ୍ଷ, ସିଆଇଏସଏଫ, ଅଗ୍ନିଶମ ଅଧିକାରୀଙ୍କ ସହ ଆଲୋଚନା କରିଛନ୍ତି ଭୁବନେଶ୍ୱର ଡିସିପି ପ୍ରତୀକ ସିଂହ । ଖେଳାଳିଙ୍କ ଆସିବା, ରହିବା ପ୍ରସଙ୍ଗରେ ଆଲୋଚନା କରାଯାଇଛି । ୧୦ ତାରିଖରେ ଉଭୟ ଟିମ୍ ଭୁବନେଶ୍ୱରରେ ପହଞ୍ଚିବେ । ଖେଳାଳି ବାରବାଟୀ ଷ୍ଟାଡିୟମ ଯିବା ସମୟରେ କିପରି ଟ୍ରାଫିକ ସମସ୍ୟା ନ ଉପୁଜିବ ସେ ନେଇ ବିସ୍ତୃତ ଆଲୋଚନା କରିଛନ୍ତି ଡିସିପି ପ୍ରତୀକ ସିଂହ ।
