ନ୍ୟୁୟର୍କ: ଜଷ୍ଟିନ୍ ବିବରଙ୍କ ଫ୍ୟାନକୁ ବଡ଼ ଝଟକା । ଆଉ ହସି ପାରୁନାହାନ୍ତି କି ଠିକରେ ଆଖି ଖୋଲି ପାରୁନାହାନ୍ତି ଜଷ୍ଟିନ୍, । ୨୮ ବର୍ଷୀୟ ଲୋକପ୍ରିୟ ହଲିଉଡ୍ ଗାୟକ ଜଷ୍ଟିନ ବିବରଙ୍କୁ ହୋଇଛି ଭୟଙ୍କର ରୋଗ । ତାଙ୍କ ମୁହଁର ଗୋଟିଏ ପାର୍ଶ୍ୱରେ ପାରାଲେସିସ୍ ହୋଇ ଯାଇଛି । ରାମସେ ହଣ୍ଟ ସିଣ୍ଡ୍ରୋମ ନାମକ ପକ୍ଷାଘାତ ରୋଗରେ ଆକ୍ରାନ୍ତ ହୋଇଛନ୍ତି ଜଷ୍ଟିନ୍ ବିବର । ନିଜେ ସୋସିଆଲ ମିଡିଆରେ ଭିଡିଓ କରି ନିଜ ରୋଗ ବିଷୟରେ ସୂଚନା ଦେଇଛନ୍ତି ଜଷ୍ଟିନ୍ ।
View this post on Instagram
ଭିଡ଼ିଓରେ ସେ କହିଛନ୍ତି,ଏ ରୋଗ ମୋତେ ଏକ ଭାଇରସ୍ ଯୋଗୁଁ ହୋଇଛି । ଯାହା ମୋ ଚେହେରା ଓ କାମକୁ ପ୍ରଭାବ ପକେଇଛି । ଆପଣମାନେ ଦେଖିପାରୁଥିବେ ମୁଁ ଆଖିପଲକ ଠିକରେ ପକାଇ ପାରୁନି କି ନାକ ହଲାଇପାରୁନି , ଠିକରେ ହସି ବି ପାରୁନି । ସେପଟେ ଏହି ଗମ୍ଭୀର ରୋଗ କାରଣରୁ ନିଜର ସମସ୍ତ ଶୋ’କୁ ରଦ୍ଦ କରିବାକୁ ବାଧ୍ୟ ହୋଇଛନ୍ତି ଜଷ୍ଟିନ୍ ।
ସ୍ବାସ୍ଥ୍ୟ ବିଶେଷଜ୍ଞଙ୍କ ମତାନୁଯାୟୀ, ରାମସେ ହଣ୍ଟ ସିଣ୍ଡ୍ରୋମ ମୁହଁର କାନ ପାଖର ଶିରକୁ ପ୍ରଭାବିତ କରିଥାଏ । ଏହା ହର୍ପିଜ ଜୋଷ୍ଟର ଓଟିକସ୍ ନାମକ ଭାଇରସ୍ ଯୋଗୁଁ ହୋଇଥାଏ । ସାମାନ୍ୟ ବେରିସେଲା ଜୋଷ୍ଟର ଭାଇରସ ମଧ୍ୟ ଚିକେନପକ୍ସର କାରଣ ମଧ୍ୟ ହୋଇଥାଏ ।
