ଅମଲାମାନେ ସମୂହ ଛୁଟିରେ, ବାଧା ଉପୁଜିଲା ଅଫିସ୍ କାମରେ
ମୁଖ୍ୟ ଶାସନ ସଚିବଙ୍କ ସହ ହେଲା ଆଲୋଚନା, ବାହାରିନି ସମାଧାନର ବାଟ
ମୋବାଇଲ୍ ନ୍ୟୁଜ୍ ବ୍ୟୁରୋ: ଦାବି ଶୁଣିଲେନି ସରକାର । ଅନିର୍ଦ୍ଦିଷ୍ଟ କାଳ ପାଇଁ ସାମୂହିକ ଛୁଟିରେ ରହିଲେ ଜିଲ୍ଲା ସ୍ତରର ଅମଲାମାନେ । ଫଳରେ ଜିଲ୍ଲା ଓ ବ୍ଲକ ସ୍ତରରେ ସରକାରୀ କାର୍ଯ୍ୟ ଗୁଡିକ ଅଚଳ ହୋଇଯାଇଛି । ବିଭିନ୍ନ ଜରୁରୀ କାମରେ ଯାଇଥିବା ଲୋକମାନେ ନାହିଁ ନଥିବା ସମସ୍ୟାର ସମ୍ମୁଖୀନ ହେଉଛନ୍ତି ।
ଅମଲାମାନେ କାର୍ଯ୍ୟ ବନ୍ଦ କରିଥିବା ବେଳେ ଏନେଇ ଆଜି ଅନଃମନ୍ତ୍ରୀସ୍ତରୀୟ ବୈଠକ ବସିବ । ତେବେ ଅମଲା ମାନଙ୍କର ମୁଖ୍ୟ ଦାବି ରହିଛି । ଷଷ୍ଠ ବେତନ କମିସନ ଆଧାରରେ ଗ୍ରେଡ ପେ ୧୯ ଶହ ଟଙ୍କାରୁ ୪୨ଶହ ଟଙ୍କାକୁ ବୃଦ୍ଧି କରାଯାଉ । ସେମାନଙ୍କ ଅଭିଯୋଗ ହେଲା ଯେ ଅମଲାଙ୍କ ବେତନରେ ବ୍ୟାପକ ଅସଙ୍ଗତି ରହିଛି । ୨୦୧୭ରୁ ଜିଲ୍ଲାସ୍ତରୀୟ ଅମଲାମାନଙ୍କ ପ୍ରବେଶିକା ଶିକ୍ଷାଗତ ଯୋଗ୍ୟତା ସ୍ନାତକ ସହିତ କମ୍ପୁ୍ୟଟର ଜ୍ଞାନ ରହିଥିଲେ ମଧ୍ୟ ବେତନରେ ଅଭିବୃଦ୍ଧି ହୋଇନାହିଁ । ଏହି ଅମଲାମାନେ ବିଭିନ୍ନ ଜନକଲ୍ୟାଣକାରୀ ଯୋଜନା ଗୁଡିକରେ ସଫଳ ରୂପାୟନ କରୁଛନ୍ତି କିନ୍ତୁ ଶ୍ରେୟ ସରକାର ନେଉଥିବା ଅଭିଯୋଗ କରିଛନ୍ତି । ଯାହାଫଳରେ ଅମଲାମାନେ ଅବହେଳା ଓ ପ୍ରତାରଣାର ଶିକାର ହେଉଛନ୍ତି । ଗତ ଏପ୍ରି ୨୧ରେ ଜିଲ୍ଲା ସ୍ତରୀୟ ମିଳିତ ଅମଲା ମଂଚ ପକ୍ଷରୁ ପ୍ରତ୍ୟକ ଜିଲ୍ଲାପାଳଙ୍କ ମାଧ୍ୟମରେ ମୁଖ୍ୟମନ୍ତ୍ରୀଙ୍କୁ ଦାବିପତ୍ର ପ୍ରଦାନ କରାଯାଇଥିଲା । ହେଲେ କୌଣସି ପଦକ୍ଷେପ ନ ନିଆଜିବାରୁ ମେ ୧ରେ ମୁଖ୍ୟ ଶାସନ ସଚିବଙ୍କୁ ଦାବିପତ୍ର ପ୍ରଦାନ କରାଯାଇଥିଲା । କିନ୍ତୁ ଦାବି ପୂରଣ ନହେବାରୁ ଗତ ୨୨ରୁ ୩୧ ତାରିଖ ପର୍ଯ୍ୟନ୍ତ ଅମଲାମାନେ କଳା ବ୍ୟାଜ ପିନ୍ଧି କାମ କରିଥିଲେ । ସେହିପରି ଦାବି ପୂରଣ ନହେଲେ ଜୁନ ୧ରୁ ସମୂହ ଛୁଟିରେ ଜିବେ ବୋଲି ଜିଲ୍ଲା ସ୍ତରୀୟ ମିଳିତ ଅମଲା ମଞ୍ଚ ପକ୍ଷରୁ ଚେତାବନୀ ଦିଆଯାଇଥିଲା । ହେଲେ ସେମାନଙ୍କ ସହ ସରକାର ଆଲୋଚନା ନକରିବାରୁ ସମୂହ ଛୁଟିରେ ଅଛନ୍ତି ଅମଲା ମାନେ । ଅମଲାମାନଙ୍କ ଦାବି ଉପରେ ଆଲୋଚନା ପାଇଁ ଆଜି ଅର୍ଥମନ୍ତ୍ରୀଙ୍କ ଅଧ୍ୟକ୍ଷତାରେ ଅନଃମନ୍ତ୍ରୀ ସ୍ତରୀୟ କମିଟି ବୈଠକ ବସିବ ବୋଲି ଜଣାପଡ଼ିଛି । ବୈଠକ ପରେ ଅମଲାମାନଙ୍କ ପ୍ରତି କି ନିଷ୍କର୍ଶ ବାହାରିବ ତାହା ଜଣାପଡିବ ।
ସେପଟେ ମୁଖ୍ୟ ଶାସନ ସଚିବଙ୍କ ସହ ଅମଲା ସଂଘର ଆଲୋଚନା ସରିଥିଲେ ମଧ୍ୟ ମୌଖିକ ପ୍ରତିଶୃତି ମିଳିଛି। ତେବେ ଲିଖିତ ପ୍ରତିଶୃତି ମିଳିବା ପର୍ଯ୍ୟନ୍ତ ଆନ୍ଦୋଳନ ବ୍ୟାପକ କରାଯିବ ବୋଲି ଅମଲାମାନେ ଚେତାବନୀ ଦେଇଛନ୍ତି।
