ନୂଆଦିଲ୍ଲୀ: ଉଦ୍ୟୋଗୀଙ୍କ ପାଇଁ ଖୁସି ଖବର l ଏନେଇ ଦିପାବଳୀ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶବାସୀଙ୍କୁ ଏକ ବଡ ଉପହାର ଦେଇଛନ୍ତି । ଅର୍ଥାତ୍ ଉଦ୍ୟୋଗୀମାନଙ୍କୁ ମୁଦ୍ରା ଯୋଜନା ଅଧୀନରେ ମିଳିବ ଡବଲ ଋଣ । ପ୍ରଧାନମନ୍ତ୍ରୀ ମୁଦ୍ରା ଯୋଜନା ଅଧୀନରେ ଉପଲବ୍ଧ ଋଣର ସୀମା ଦ୍ୱିଗୁଣିତ ହୋଇଛି । ବର୍ତ୍ତମାନ ଆପଣ ପ୍ରଧାନମନ୍ତ୍ରୀ ମୁଦ୍ରା ଯୋଜନା ଅଧୀନରେ ୨୦ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ନେଇପାରିବେ । ପୂର୍ବରୁ ଏହି ସୀମା ୧୦ ଲକ୍ଷ ଟଙ୍କା ଥିଲା l କିନ୍ତୁ ସରକାର ଏହାକୁ ଦ୍ୱିଗୁଣିତ କରିଛନ୍ତି ।
ଛୋଟ ଉଦ୍ୟୋଗୀଙ୍କୁ ମଜଭୁତ କରିବା ଏବଂ ଦେଶରେ ନିଯୁକ୍ତି ସୁଯୋଗ ବୃଦ୍ଧି ପାଇଁ ଏହି ନିଷ୍ପତ୍ତି ନିଆଯାଇଛି । ଅର୍ଥ ମନ୍ତ୍ରଣାଳୟ ଅନୁଯାୟୀ ଏହି ପଦକ୍ଷେପ ମୁଦ୍ରା ଯୋଜନାର ଉଦ୍ଦେଶ୍ୟକୁ ଅଧିକ ପ୍ରଭାବଶାଳୀ ଭାବେ ପୂରଣ କରିବ । ଏହି ନିଷ୍ପତ୍ତି ଛୋଟ ବ୍ୟବସାୟୀମାନଙ୍କୁ ସେମାନଙ୍କର ବ୍ୟବସାୟକୁ ବିସ୍ତାର କରିବାରେ ଏବଂ ନୂତନ ସୁଯୋଗର ଲାଭ ଉଠାଇବାରେ ସାହାଯ୍ୟ କରିବ । ଏହା ନୂତନ ନିଯୁକ୍ତି ସୁଯୋଗ ସୃଷ୍ଟି କରିବ ଏବଂ ଦେଶର ଅର୍ଥନୀତିକୁ ମଜଭୁତ କରିବାରେ ସାହାଯ୍ୟ କରିବ ।
ଅର୍ଥମନ୍ତ୍ରୀ ନିର୍ମଳା ସୀତାରମଣ ୨୦୨୪-୨୫ ଆର୍ଥିକ ବର୍ଷ ପାଇଁ ବଜେଟ ଉପସ୍ଥାପନ କରୁଥିବାବେଳେ ଜୁଲାଇ ୨୩, ୨୦୨୪ ରେ ଘୋଷଣା କରିଥିଲେ ଯେ ପ୍ରଧାନମନ୍ତ୍ରୀ ମୁଦ୍ରା ଯୋଜନା ଅନୁଯାୟୀ ଦିଆଯାଇଥିବା ୧୦ ଲକ୍ଷ ଟଙ୍କାର ଋଣ ସୀମା ୨୦ ଲକ୍ଷ ଟଙ୍କାକୁ ବୃଦ୍ଧି କରାଯିବ। ବର୍ତ୍ତମାନ ଏହି ଘୋଷଣା କାର୍ଯ୍ୟକାରୀ ହୋଇଛି । ଅର୍ଥ ମନ୍ତ୍ରଣାଳୟ କହିଛି ଯେ ଏହି ସୀମା ବୃଦ୍ଧି ମୁଦ୍ରା ଯୋଜନାର ଲକ୍ଷ୍ୟ ହାସଲ କରିବାରେ ସହାୟକ ହେବ ଏବଂ ଏହିପରି ନୂତନ ଉଦ୍ୟୋଗୀ ଯେଉଁମାନେ ପାଣ୍ଠି ଆବଶ୍ୟକ କରନ୍ତି ସେମାନେ ବର୍ତ୍ତମାନ ସେମାନଙ୍କର ବ୍ୟବସାୟର ଅଭିବୃଦ୍ଧି ଏବଂ ବିସ୍ତାର ପାଇଁ ଅଧିକ ପାଣ୍ଠି ଯୋଗାଇବାରେ ସକ୍ଷମ ହେବେ ।
