ନୂଆଦିଲ୍ଲୀ: ପୁଣି ଅଡୁଆରେ ରାହୁଲ ଗାନ୍ଧି । ଚାଲି ଯାଇପାରେ ନାଗରିକତା! ଏନେଇ କୋର୍ଟଙ୍କ ରାୟ ସାମ୍ନାକୁ ଆସିଛି । ଆହ୍ଲାବାଦ ହାଇକୋର୍ଟ ରାହୁଲଙ୍କ ନାଗରିକତ୍ୱ ସମ୍ବନ୍ଧିତ ଯାଚିକା ଉପରେ ଶୁଣାଣି କରିଛନ୍ତି। ଶୁଣାଣି ସମୟରେ କେନ୍ଦ୍ର ସରକାର ନିଜର ପକ୍ଷ ରଖିଛନ୍ତି। ସେ କହିଛନ୍ତି, ରାହୁଲଙ୍କ ନାଗରିକତା ରଦ୍ଦ ହେବ କି ନାହିଁ ଏନେଇ ବିଚାର କରିବେ। ତେବେ ଏହାର ଶୁଣାଣିକୁ କୋର୍ଟ ଡିସେମ୍ବର ୧୯କୁ ଘୁଞ୍ଚାଇଛନ୍ତି।
କର୍ଣ୍ଣାଟକ ଅଧିବାସୀ ଏସ ବିଘ୍ନେଶ ସେପ୍ଟେମ୍ବର ୧୨ରେ ଏକ ଜନହିତ ଯାଚିକା ଦାଖଲ କରିଥିଲେ। ଯେଉଁଥିରେ ସେ ରାହୁଲଙ୍କ ପାଖରେ ଇଂଲଣ୍ଡର ନାଗରିକତ୍ୱ ଥିବା ଦାବି କରିଥିଲେ। ଆବେଦନକାରୀ କହିଥିଲେ, ସେ ଗଭୀର ଯାଞ୍ଚ ପରେ ଏହି ଗୋପନୀୟ ତଥ୍ୟ ହାସଲ କରିଛନ୍ତି। ଏହି ମାମଲାକୁ ସିବିଆଇ ଯାଞ୍ଚ ପାଇଁ ନିର୍ଦ୍ଦେଶ ଦେବା ସହିତ ତାଙ୍କର ଭାରତୀୟ ନାଗରିକତ୍ୱ ରଦ୍ଦ କରାଯାଉ ବୋଲି ସେ ଦାବି କରିଥିଲେ।
ଭାରତର ଡେପୁଟି ସିଲିସିଟର ଜେନରାଲ ଏସବି ପାଣ୍ଡେ କୋର୍ଟକୁ କହିଛନ୍ତି, ରାହୁଲଙ୍କ ବ୍ରିଟିଶ ନାଗରିକତା ଆଧାରରେ ଭାରତୀୟ ନାଗରିକତା ରଦ୍ଦ କରିବା ଦାବିକୁ ମନ୍ତ୍ରାଳୟକୁ ସୂଚନା ମିଳିଛି। ଯାହାକି ପ୍ରକ୍ରିୟାରେ ଅଛି।
