ଭୁବନେଶ୍ୱର: ପୁଣି ବାଜିବ ଟ୍ରାଫିକ ଛାଟ । ସାବାଡ ହେବେ ଅମାନିଆ ଗାଡି ଚାଳକ । କାରଣ ଖୁବଶୀଘ୍ର ଲାଗୁ ହେବ ନୂଆ ନିୟମ । ତେବେ ଦର୍ଶକ ବନ୍ଧୁ ଆପଣଙ୍କ ଗାଡିର ଇ-ଚାଲାଣ କଟିଛି, ଯାହା ଏବେ ବି ପେଣ୍ଡିଂ ଅଛି? କଣ ଆପଣ ଏଯାଏ ଦେଇନାହାନ୍ତି କି ଟ୍ରାଫିକ୍ ଫାଇନ? ଯଦି ଏମିତି କିଛି ନିୟମ ଫାଙ୍କିଛନ୍ତି, ତେବେ ହେଇଯାଆନ୍ତୁ ସାବଧାନ । ନହେଲେ ରଦ୍ଦ ହୋଇପାରେ ଲାଇସେନ୍ସ । ହଁ ଆପଣ ଠିକ୍ ଶୁଣିଛନ୍ତି । ବାକିଥିବା ଟ୍ରାଫିକ ଇ-ଚାଲାଣ ନଭରିଲେ ଲାଇସେନ୍ସ କଟିଯିବ । ଏନେଇ ୩ମାସ ଭିତରେ ଭରିବାକୁ ପଡିବ ଫାଇନ୍ । ଏଥିସହ ରେଡ ସିଗନାଲ ଓ ବିପଦପୂର୍ଣ୍ଣ ଗାଡି ଚଳାଇବା ପାଇଁ ଯଦି ୩ଟି ଚାଲାଣ କଟିଥିବ, ତାହାଲେ ମଧ୍ୟ ଲାଇସେନ୍ସ ରଦ୍ଦ ହେବ । ଏନେଇ କେନ୍ଦ୍ର ସରକାର ଯୋଜନା କରୁଥିବା ବେଳେ ଖୁବଶୀଘ୍ର ଏହି ନିୟମ ଲାଗୁ ହେବ ବୋଲି ଚର୍ଚ୍ଚା ଜୋର ଧରିଛି । ସାରା ଦେଶରେ ଇ-ଚାଲାଣ ଆଦାୟ ହୋଇପାରିନଥିବା ବେଳେ କେନ୍ଦ୍ର ସରକାର ଏହି ଯୋଜନା କରୁଛନ୍ତି ।
୨୦୨୫ ଆର୍ଥିକ ବର୍ଷରେ ମାତ୍ର ୪୦ ପ୍ରତିଶତ ଇ-ଚାଲାଣ ଫାଇନ ଆଦାୟ ହୋଇଛି । ସାରା ଦେଶରେ ୪୦ ହଜାର ୫୪୮ କୋଟି ଟଙ୍କା ଫାଇନ୍ ପଡ଼ିଥିବା ବେଳେ ୧୬ ହଜାର ୩୨୪ କୋଟି ଟଙ୍କା ଆଦାୟ ହୋଇଛି । ଯାହାକି ମାତ୍ର ୪୦ ପ୍ରତିଶତ । ଯଦି ଓଡ଼ିଶା କଥା କହିବା ତାହାଲେ ଓଡ଼ିଶାରେ ଜରିମାନା ଆଦାୟର ହାର ୨୯ ପ୍ରତିଶତ ରହିଛି । ପୂର୍ବରୁ ସୁପ୍ରିମକୋର୍ଟ ମଧ୍ୟ ଟ୍ରାଫିକ ଚାଲାଣ ଓ ଦୁର୍ଘଟଣା ଉପରେ ଅନେକ ଥର ରାୟ ଦେଇଛନ୍ତି । ଏହାକୁ ନଜରରେ ରଖି ଟ୍ରାଫିକ ବ୍ୟବସ୍ଥା ଓ ଗାଡି ଚାଳନାରେ ସୁଧାର ପାଇଁ ସରକାର ଇ-ଚାଲାଣ ଆଦାୟ ଉପରେ ବିଶେଷ ଗୁରୁତ୍ବ ଦେଉଛନ୍ତି । ତେବେ ଜାତୀୟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ପ୍ରଥମେ ଡ୍ରାଇଭର କିମ୍ବା ଯାନବାହନ ମାଲିକଙ୍କୁ ଏକ ଇ-ଚାଲାଣ ନୋଟିସ୍ ପଠାଯିବ । ତା’ପରେ ସେମାନଙ୍କୁ ୩୦ ଦିନ ମଧ୍ୟରେ ଜରିମାନା ଦେବାକୁ ପଡିବ କିମ୍ବା ଏହାକୁ ଚ୍ୟାଲେଞ୍ଜ କରିବାକୁ ପଡିବ। ଯଦି ୩ ମାସ ମଧ୍ୟରେ ପୈଠ ନକଲେ ଡ୍ରାଇଭିଂ ଲାଇସେନ୍ସ କିମ୍ବା ଗାଡ଼ିର ପଞ୍ଜିକରଣ ପ୍ରମାଣପତ୍ର ରଦ୍ଦ କରାଯିବ ।
