ପୁରୀ: ପ୍ରଶିକ୍ଷଣ ନେଉଛନ୍ତି ଶ୍ରୀମନ୍ଦିର ସେବାୟତ। ଭକ୍ତଙ୍କୁ କେଉଁଭଳି ବ୍ୟବହାର କରାଯିବ, ମହାପ୍ରଭୁଙ୍କ ନୀତିକାନ୍ତି କିଭଳି ସୁରୁଖୁରୁରେ ଚାଲିବ ସେ ନେଇ ଆଲୋଚନା ହେଉଛି । ବଡ଼ଦାଣ୍ଡ ସ୍ଥିତ ନିଳାଦ୍ରୀ ଭକ୍ତ ନିବାସ ଠାରେ ସେବକମାନଙ୍କୁ ପ୍ରଶିକ୍ଷଣ ଦିଆଯାଉଛି । ଶୁକ୍ରବାର ଏବଂ ଶନିବାର ଦୁଇ ଦିନ ଧରି ଏହା ଚାଲିବ । ପ୍ରଥମ ଦିନ ଅର୍ଥାତ ୪ ତାରିଖର ବିଷୟ ରହିଛି ଉତ୍ତମ ସେବକର ଲକ୍ଷଣ, ଶ୍ରୀଜିଉଙ୍କ ଶୃଙ୍ଖଳିତ ନୀତିକାନ୍ତି, ସେବା ଓ ସେବକ । ସେହିପରି ୫ ତାରିଖ ଦ୍ବିତୀୟ ଦିନର ବିଷୟ ରହିଛି ଶୃଙ୍ଖଳିତ ଦର୍ଶନରେ ସେବକଙ୍କ ଭୂମିକା, ଉତ୍ତମ ଯାତ୍ରୀ ପରିଚର୍ୟ୍ୟା, ପ୍ରଶାସନ ଓ ସେବକଙ୍କ ମଧ୍ୟରେ ସମନ୍ଵୟ ।
ଜିଲ୍ଲାପାଳ ତଥା ଉପ ମୁଖ୍ୟ ପ୍ରଶାସକଙ୍କ ଅଧ୍ୟକ୍ଷତାରେ ବରିଷ୍ଠ ସେବକଙ୍କ ଏକ ବୈଠକ ଅନୁଷ୍ଠିତ ହୋଇ ଆଲୋଚନାର ବିଷୟ ଗୁଡିକ ନିର୍ଦ୍ଧାରିତ ହୋଇଛି । ଅପରାହ୍ନ ୪ଟା ଠାରୁ ସନ୍ଧ୍ୟା ୭ଟା ଯାଏଁ ବିଭିନ୍ନ ବିଷୟ ଉପରେ ଆଲୋଚନା ତଥା ଭାବବିନିମୟ ହେବ । ଏହି ପ୍ରଶିକ୍ଷଣ ଶିବିରରେ ସମସ୍ତ ନିଯୋଗର ବରିଷ୍ଠ ଓ ଯୁବ ସେବାୟତ ମାନେ ଉପସ୍ଥିତ ରହିବାକୁ ଶ୍ରୀମନ୍ଦିର ପ୍ରଶାସନ ପକ୍ଷରୁ ଅନୁରୋଧ କରାଯାଇଛି । ତେବେ ଏହି ପ୍ରଶିକ୍ଷଣ ଦ୍ୱାରା ଆଗକୁ ସାଧାରଣ ଲୋକେ ଉପକୃତ ହେବେ ବୋଲି ଆଶା କରାଯାଉଛି ।
