ନୂଆଦିଲ୍ଲୀ: ଟ୍ୱିଷ୍ଟ ଦେଲେ ଦେବାଶିଷ । କହିଲେ ସଂସଦରେ କ’ଣ ହେଲା ମୁଁ ବୁଝି ପାରିଲିନି । ନିଜ ସୋସିଆଲ ମିଡିଆ ଆକାଉଣ୍ଟ ଫେସବୁକରେ ସେ ଏକ ପୋଷ୍ଟ କରି ସସ୍ମିତଙ୍କ କାର୍ଯ୍ୟ ପରେ ନିଜ ଅସନ୍ତୋଷ ଜାହିର କରିଛନ୍ତି ଦେବାଶିଷ ସାମନ୍ତରାୟ ।
ସେ ଲେଖିଛନ୍ତି ଯେ, “ଗଣତନ୍ତ୍ର ଓ ଧର୍ମନିରପେକ୍ଷତାରେ ବିଶ୍ୱାସ କରୁଥିବା ବିଜୁ ଜନତା ଦଳ ‘ୱାକଫ ସଂଶୋଧନ ବିଲ’ ପ୍ରସଙ୍ଗରେ ନିଜର ସ୍ପଷ୍ଠ ପକ୍ଷ ରଖିବାରେ ବିଫଳ ହେବା ମତେ ବ୍ୟଥିତ କରିଛି। ଦୁଇ ଦୁଇଥର ସଂସଦୀୟ କମିଟି ବୈଠକରେ ମାନ୍ୟବର ସଭାପତିଙ୍କ ନିର୍ଦେଶ ଥିଲା ରାଜ୍ୟସଭାରେ ଏହି ବିଲକୁ ଜୋରଦାର ବିରୋଧ କରାଯିବ। ଏଥି ସହିତ ବିଜୁ ଜନତା ଦଳ ଏହାର ଇସ୍ତାହାରରେ ମଧ୍ୟ ସ୍ପଷ୍ଠ କରିଥିଲାଯେ ୱାକଫ ସଂଶୋଧନ ବିଲକୁ ବିରୋଧ କରିବ । ଶଙ୍ଖ ଭବନରେ ଆୟୋଜିତ ଏକ କାର୍ୟ୍ୟକ୍ରମରେ, ମାନ୍ୟବର ସଭାପତି ସଂଖ୍ୟାଲଘୁ ସମ୍ପ୍ରଦାୟର ଭାଇ ଭଉଣୀମାନଙ୍କୁ ଭେଟି ଏହି ବିଲକୁ ରାଜ୍ୟସଭାରେ ବିରୋଧ କରାଯିବା ନେଇ ଆଲୋଚନା ମଧ୍ୟ କରିଥିଲେ । ହୁଇପି ଜାରି ନକରି , ମାତ୍ର ଭୋଟିଂ ଦିନ ସନ୍ଧ୍ୟାରେ ଅତି ତରବରିଆ ଭାବରେ ସଂସଦୀୟ ଦଳର ନେତା ଡ଼ ସସ୍ମିତ ପାତ୍ର ଟୁଇଟ କରି ନିଜ ନିଜ ବିବେକ ଅନୁସାରେ ଭୋଟ ଦେବାକୁ ସାଂସଦମାନଙ୍କୁ ପରାମର୍ଶ ଦେଇଥିଲେ। ଏହି ନିଷ୍ପତ୍ତି ପରିବର୍ତ୍ତନ ଫଳରେ ଦଳ ସଂଖ୍ୟଲଘୁ ସମ୍ପ୍ରଦାୟର ଅବିଶ୍ୱାସର ପାତ୍ର ହେବା ସହ ଅପୂରଣୀୟ କ୍ଷତି ସହିବାକୁ ଯାଉଛି । ଯାହା ମୋତେ ବହୁତ କଷ୍ଟ ଦେଇଛି । ଏହି କାରଣରୁ ମୋ ବିବେକ ଅନୁଯାୟୀ ସମ୍ବିଧାନ ଓ ଧର୍ମନିରପେକ୍ଷତାକୁ ସମର୍ଥନ ଜଣାଇ ମତଦାନରୁ ଦୁରେଇ ରହିଲି। ଏବେ ବିଜୁ ଜନତା ଦଳର ଆଦର୍ଶରେ ବିଶ୍ୱାସ କରୁଥିବା କୋଟି କୋଟି ବିଜୁପ୍ରେମୀ ଜାଣିବାକୁ ଚାହାନ୍ତି ଦଳର ଏହି ତରବରିଆ ନିଷ୍ପତ୍ତି ପରିବର୍ତ୍ତନ ପଛରେ ଦାୟୀ କିଏ ?”
ଦେବାଶିଷଙ୍କ ଏପରି ପୋଷ୍ଟ ପରେ ଚୁପ କାହିଁକି ବସିଛନ୍ତି ବିଜେଡି ସୁପ୍ରିମୋ? ଅନ୍ୟ ବିଜେଡି ସାଂସଦଙ୍କ ପ୍ରତିକି୍ରୟା ମଧ୍ୟ କ’ଣ ପାଇଁ ସାମ୍ନାକୁ ଆସୁନି ତାକୁ ନେଇ ମଧ୍ୟ ଚଚ୍ଚା ଜୋର ।
