ନୂଆଦିଲ୍ଲୀ ୧୨/ଅଗଷ୍ଟ : ଦେଶରେ ଏକ ଚାଞ୍ଚଲ୍ୟକର ଖବର ସାମ୍ନାକୁ ଆସିଥିଲା, ଯାହା ସମସ୍ତଙ୍କୁ ଚକିତ କରିଥିଲା । ଘଟଣାଟି ହେଉଛି ଦିଲ୍ଲୀ ହାଇକୋର୍ଟର ପୂର୍ବତନ ବିଚାରପତି ଯଶୱନ୍ତ ବର୍ମାଙ୍କ ଘରୁ ପୋଡ଼ି ଯାଇଥିବା ଟଙ୍କା ଉଦ୍ଧାର ହୋଇଥଲା । ଉକ୍ତ ଘଟଣାଟି ଦେଶର ନ୍ୟାୟପାଳିକାର ସଚ୍ଚୋଟତା ଉପରେ ପ୍ରଶ୍ନ ଉଠାଇଥିଲା । ତେବେ ଉକ୍ତ ଘଟଣାରେ ଲୋକସଭା ବାଚସ୍ପତି ଓମ୍ ବିର୍ଲା ଘୋଷଣା କରିଛନ୍ତି ଯେ ତଦନ୍ତ ପାଇଁ ଏକ ତିନି ଜଣିଆ କମିଟି ଗଠନ କରାଯିବ। ଏହି ତିନିଜଣିଆ ପ୍ୟାନେଲ୍ ହାଇକୋର୍ଟ ବିଚାରପତି ଜଷ୍ଟିସ୍ ଯଶୱନ୍ତ ବର୍ମାଙ୍କ ବିରୋଧରେ ଅଭିଯୋଗର ତଦନ୍ତ କରିବ। ସୁପ୍ରିମକୋର୍ଟର ବିଚାରପତି ଜଷ୍ଟିସ୍ ଅରବିନ୍ଦ କୁମାର, ମାଡ୍ରାସ ହାଇକୋର୍ଟର ମୁଖ୍ୟ ବିଚାରପତି ମନୀନ୍ଦ୍ର ମୋହନ ଶ୍ରୀବାସ୍ତବ ଏବଂ ବରିଷ୍ଠ ଓକିଲ ବିଭି ଆଚାର୍ଯ୍ୟଙ୍କୁ ନେଇ ଗଠିତ ଏହି ପ୍ୟାନେଲ୍ ଲୋକସଭା ବାଚସ୍ପତିଙ୍କ ନିକଟରେ ତାଙ୍କର ମତାମତ ଦାଖଲ କରିବେ, ଯିଏ ଜଷ୍ଟିସ୍ ବର୍ମାଙ୍କ ବିରୋଧରେ ୧୪୬ ଜଣ ସାଂସଦଙ୍କ ଦ୍ୱାରା ସ୍ୱାକ୍ଷରିତ ମହାଭିଯୋଗ ପ୍ରସ୍ତାବକୁ ମଧ୍ୟ ଗ୍ରହଣ କରିଛନ୍ତି। ସମ୍ବିଧାନର ଧାରା ୧୨୪(୪) ଅନୁଯାୟୀ, କମିଟି ପ୍ରମାଣ ଉପସ୍ଥାପନ କରିପାରିବ ଏବଂ ସାକ୍ଷୀମାନଙ୍କୁ ପଚରାଉଚରା କରିପାରିବ। ଯଦି ବିଚାରପତି ଦୋଷୀ ସାବ୍ୟସ୍ତ ହୁଅନ୍ତି, ତେବେ ପ୍ରସ୍ତାବକୁ ଉଭୟ ଗୃହ ଦ୍ୱାରା ଗୃହୀତ ହେବାକୁ ପଡ଼ିବ। ଶାସକ ଏବଂ ବିରୋଧୀ ଦଳର ସମ୍ମତି ସହିତ, ପ୍ରକ୍ରିୟା କୌଣସି ବାଧା ବିନା ଆଗକୁ ବଢ଼ିବା ଆଶା କରାଯାଉଛି।
