ନୂଆଦିଲ୍ଲୀ ୧୩/ଅଗଷ୍ଟ : ଆମେରିକା ସହ ଟାରିଫ ବିବାଦ ଚାଲିଥିବା ବେଳେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆସନ୍ତା ସେପ୍ଟେମ୍ବର ମାସରେ ଆମେରିକା ଗସ୍ତ କରିପାରନ୍ତି। ଏହି ଗସ୍ତ ସନ୍ଦର୍ଭରେ ସେ ନ୍ୟୁୟର୍କ ସ୍ଥିତ ମିଳିତ ଜାତିସଂଘ ସାଧାରଣ ପରିଷଦ (UNGA)ର ଅଧିବେଶନରେ ଅଂଶଗ୍ରହଣ କରିବେ ଏବଂ ଏଥିରେ ଉଦବୋଧନ ମଧ୍ୟ ଦେବେ। ସେପ୍ଟେମ୍ବର ମାସରେ ଆୟୋଜିତ ହେବାକୁ ଯାଉଥିବା ଏହି ଅଧିବେଶନ ଦ୍ୱାରା ପ୍ରଧାନମନ୍ତ୍ରୀ ମୋଦି ଭାରତର ବିଶ୍ୱ ମଞ୍ଚରେ ଅବସ୍ଥାନକୁ ସୁଦୃଢ଼ କରିପାରିବେ ବୋଲି ଆଶା କରାଯାଉଛି। ଏହି ଗସ୍ତ ସମୟରେ ପ୍ରଧାନମନ୍ତ୍ରୀ ମୋଦି ଓ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମଧ୍ୟରେ ଦ୍ୱିପାକ୍ଷିକ ଆଲୋଚନା ହେବାର ସମ୍ଭାବନା ରହିଛି। ବର୍ତ୍ତମାନ ଭାରତ ଓ ଆମେରିକା ମଧ୍ୟରେ ବାଣିଜ୍ୟ ଶୁଳ୍କ ନେଇ ବିବାଦ ଚାଲିଛି, ଯେଉଁଥିରେ ଆମେରିକା ଭାରତର ଉତ୍ପାଦନ ସାମଗ୍ରୀ ଉପରେ ୫୦% ଶୁଳ୍କ ଲାଗୁ କରିଛି। ଏହି ଆଲୋଚନା ମାଧ୍ୟମରେ ଦୁଇ ଦେଶ ମଧ୍ୟରେ ବାଣିଜ୍ୟ ସମ୍ପର୍କ ସୁଧାରିବା ପାଇଁ ଏକ ସାକାରାତ୍ମକ ପଦକ୍ଷେପ ଗ୍ରହଣ କରାଯିବ ବୋଲି ଅନେକ ନୀତିନିର୍ଦ୍ଦେଶକ ଆଶା କରୁଛନ୍ତି।
