ଭୁବନେଶ୍ୱର,୧୦/୦୨/୨୦୨୬:କେନ୍ଦ୍ରୀୟ ଟ୍ରେଡ୍ ୟୁନିଅନ୍ ଏବଂ କୃଷକ ସଂଗଠନଗୁଡ଼ିକ ପକ୍ଷରୁ ଆସନ୍ତା ଫେବୃଆରୀ ୧୨ ତାରିଖ, ଗୁରୁବାର ଦିନ ଦେଶବ୍ୟାପୀ ଧର୍ମଘଟ ଡାକରା ଦିଆଯାଇଛି। ଏହି ଭାରତ ବନ୍ଦ ଯୋଗୁଁ ଦେଶର ବିଭିନ୍ନ ସ୍ଥାନରେ ସାଧାରଣ ଜୀବନଯାତ୍ରା ବ୍ୟାପକ ଭାବେ ବାଧାପ୍ରାପ୍ତ ହେବାର ସମ୍ଭାବନା ରହିଛି। ବିଶେଷ କରି ବ୍ୟାଙ୍କିଂ ସେବା, ପରିବହନ ଏବଂ ସରକାରୀ କ୍ଷେତ୍ରର ବ୍ୟବସାୟିକ କାର୍ଯ୍ୟକଳାପ ଉପରେ ଏହାର ଗଭୀର ପ୍ରଭାବ ପଡ଼ିପାରେ।
ଏହି ଧର୍ମଘଟ ସମୟରେ କିଛି ନିର୍ଦ୍ଦିଷ୍ଟ ଅଞ୍ଚଳରେ ଶିକ୍ଷାନୁଷ୍ଠାନ, ବଜାର ଏବଂ ଦୋକାନ ବଜାର ବନ୍ଦ ରହିବା ସହ “ଚକ୍କା ଜାମ” ବା ରାସ୍ତା ଅବରୋଧ ହେବାର ଆଶଙ୍କା ରହିଛି। ଓଡ଼ିଶାରେ ମଧ୍ୟ ଏହି ବନ୍ଦର ପ୍ରଭାବ ଦେଖିବାକୁ ମିଳିପାରେ ବୋଲି ଅନୁମାନ କରାଯାଉଛି। CITU, AITUC, INTUC ଏବଂ HMS ଭଳି ଦେଶର ପ୍ରମୁଖ ଶ୍ରମିକ ସଂଗଠନଗୁଡ଼ିକ ଏହି ଆନ୍ଦୋଳନକୁ ନେତୃତ୍ୱ ଦେଉଥିବା ବେଳେ ସଂଯୁକ୍ତ କିଷାନ ମୋର୍ଚ୍ଚା (SKM) ମଧ୍ୟ ଏହାକୁ ପୂର୍ଣ୍ଣ ସମର୍ଥନ ଜଣାଇଛି।
ଏହି ଆନ୍ଦୋଳନର ମୁଖ୍ୟ କାରଣ ହେଉଛି କେନ୍ଦ୍ର ସରକାରଙ୍କ ଦ୍ୱାରା ପ୍ରଣିତ ଚାରୋଟି ନୂତନ ଶ୍ରମ ସଂହିତା। ଏହି ନୂଆ ନିୟମ ପୂର୍ବରୁ ଥିବା ୨୯ଟି ଶ୍ରମ ଆଇନକୁ ପରିବର୍ତ୍ତନ କରୁଥିବାରୁ ଏବଂ ଏହା ଶ୍ରମିକମାନଙ୍କ ସ୍ୱାର୍ଥ ବିରୋଧୀ ବୋଲି ଦର୍ଶାଇ ସଂଗଠନଗୁଡ଼ିକ ଏହାର ବିରୋଧ କରୁଛନ୍ତି। ଶ୍ରମିକ ବର୍ଗଙ୍କ ଉପରେ ହେଉଥିବା ଆକ୍ରମଣ ଓ ସେମାନଙ୍କ ଅଧିକାରକୁ ସୁରକ୍ଷିତ ରଖିବା ପାଇଁ ଏହି ଦେଶବ୍ୟାପୀ ଧର୍ମଘଟ ଡାକରା ଦିଆଯାଇଛି।
