ନୂଆଦିଲ୍ଲୀ: ଘିବଲି…ଘିବଲୀ…ଘିବଲୀ । ଗତ କିଛିଦିନ ହେବ ଏହା ଟ୍ରେଣ୍ଡିଂରେ । ସମସ୍ତେ ଏବେ ଘିବଲୀ ଷ୍ଟାଇଲର ମାୟାଜାଲରେ । ଯୁଆଡେ ଦେଖିବ, ଯାହା ପାଟିରୁ ଶୁଣିବ ଖାଲି ଘିବଲୀ । ଲଗାତାର କିଛିଦିନ ହେବ ସୋସିଆଲ ମିଡିଆରେ ଏହା ଟ୍ରେଣ୍ଡ କରୁଛି । ଘରେ ଘରେ ଏବେ ସେ ବେଶ ପରିଚିତ । ସମସ୍ତଙ୍କୁ ଏବେ ଘାଇଲା କରିଛି ଏହି ଘିବଲୀ ଫଟୋ । କିଏ ୱାସ୍ଆପ ଷ୍ଟାଟସରେ ତ ଆଉ କିଏ ବିଭିନ୍ନ ସୋସିଆଲ ମିଡିଆରେ କରୁଛି ପୋଷ୍ଟ । ଏପରିକି ଯାହା ଡିପିରେ ଦେଖିବ ସେଠି ଘିବଲୀ ଫଟୋ ବା ଘିବଲୀ ଆର୍ଟ । ରାଜନେତା ଠାରୁ ସେଲିବ୍ରେଟି, ଛୋଟ ଠାରୁ ବଡ…ପ୍ରାୟ ସବୁ ବର୍ଗର ଲୋକଙ୍କୁ ଏବେ କିମିଆ କରିଛି ନିଜର କାର୍ଟୁନ ଫଟୋ । ମୋଦି, ମୋହନଙ୍କ ଠାରୁ ଆରମ୍ଭ କରି ଅଭିନେତା ଅମିତାଭ ବଚନ ଏପରିକି ଏଲନ ମସ୍କଙ୍କ ପର୍ୟ୍ୟନ୍ତ ଆନ୍ତର୍ଜାତିକ ସ୍ତରର ବ୍ୟକ୍ତିତ୍ୱ ବି ଏବେ ଘିବଲୀ ମାୟାରେ । ଚାଟ୍ ଜିପିଟିରେ କିଏ ନିଜର ଫଟୋକୁ ଘିବଲୀ ଷ୍ଟାଇଲ କରୁଛି ତ, ଆଉ କିଏ ଭିଭିନ୍ନ ଆପ ମାଧ୍ୟମରେ ତିଆରି କରୁଛି ।
ତେବେ ଆପଣ କଣ ଏହା ପ୍ରତି ଆକୃଷ୍ଟ ହେଉଛନ୍ତି କି? ଅନ୍ୟକୁ ଦେଖି ଆପଣ ବି ଘିବଲୀ ଫଟୋ ତିଆରି କରୁଛନ୍ତି କି? ତାହେଲେ ହୋଇଯାଆନ୍ତୁ ସାବଧାନ । କାରଣ ଏହି ଘିବଲୀ ଆପଣଙ୍କୁ ବଡ ସମସ୍ୟାରେ ପକାଇପାରେ । କିଛି ସମୟର ଖୁସି ଆପଣଙ୍କ ପାଇଁ ବିପଦ ଆଣିପାରେ । କାରଣ ଆପଣଙ୍କ ଫଟୋ ଆଗକୁ କେଉଁ ଉଦ୍ଦେଶ୍ୟରେ ବ୍ୟବହାର ହେବ ତାହା କାହାକୁ ଜଣାନାହିଁ । କିନ୍ତୁ ଏହାଦ୍ୱାରା ଆପଣଙ୍କ ବ୍ୟକ୍ତିଗତ ଫଟୋ ଲିକ୍ ହେଇପାରେ ଏବଂ ତୃତୀୟ ପକ୍ଷକୁ ବି ବିକ୍ରି କରାଯିବା ନେଇ ଯଥେଷ୍ଟ ସମ୍ଭାବନା ଥିବା କୁହାଯାଉଛି । ତେଣୁ ସାଇବର ଠକ ଏହି ଫଟୋକୁ ଅପବ୍ୟବହାର କରିପାରନ୍ତି ବୋଲି ସତର୍କ କରାଇଛନ୍ତି ଏକ୍ସପର୍ଟ । ତେବେ ପ୍ରଶ୍ନ ଘିବଲୀ ଷ୍ଟାଇଲ କେତେ ସୁରକ୍ଷିତ ? କେତେ ଭୟଙ୍କର ଏହି ଘିବଲୀ ଆର୍ଟ । ଯାହାକୁ ନେଇ ଚର୍ଚ୍ଚା ।
