ନୂଆଦିଲ୍ଲୀ: ଇଡି କାର୍ଯ୍ୟାଳୟରେ ପହଁଚିଲେ କଂଗ୍ରେସ ସାଂସଦ ରାହୁଲ ଗାନ୍ଧୀ । ନ୍ୟାସନାଲ ହେରାଲ୍ଡ ମାମଲାରେ କଂଗ୍ରେସ ନେତା ରାହୁଲ ଗାନ୍ଧୀ ଆଜି ଚତୁର୍ଥ ଥର ଲାଗି ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ସାମ୍ନାରେ ହାଜର ହୋଇଛନ୍ତି । ରାହୁଲଙ୍କୁ ପୂର୍ବରୁ ଏ ନେଇ ତିନି ରାଉଣ୍ଡ ପଚରାଉଚରା କରାଯାଇଛି । ପୂର୍ବରୁ ତାଙ୍କୁ ଶୁକ୍ରବାର ଜେରା କରାଯାଇଥାନ୍ତା । କିନ୍ତୁ ସେ କେନ୍ଦ୍ରୀୟ ଏଜେନ୍ସିକୁ ଏକ ଚିଠି ଲେଖି ସୋମବାର ପର୍ଯ୍ୟନ୍ତ ଇଡିରେ ହାଜର ହେବାକୁ ସ୍ଥଗିତ ରଖାଯାଉ ବୋଲି କହିଥିଲେ । କାରଣ କୋଭିଡରେ ସଂକ୍ରମିତ ହୋଇ ଡାକ୍ତରଖାନାରେ ଚିକିତ୍ସିତ ହେଉଥିବା ତାଙ୍କ ମା’ ତଥା କଂଗ୍ରେସ ଅଧ୍ୟକ୍ଷ ସୋନିଆ ଗାନ୍ଧୀଙ୍କ ସହ ରହିବା ତାଙ୍କର ଆବଶ୍ୟକ ରହିଛି ବୋଲି ସେ କହିଥିଲେ ।
ତେବେ ରାହୁଲ ଗାନ୍ଧୀ ଇଡିରେ ହାଜର ହେବାକୁ ନେଇ ଖପ୍ପା କଂଗ୍ରେସ । ଦଳ ପକ୍ଷରୁ ଜୋରଦାର ବିକ୍ଷୋଭ ପ୍ରଦର୍ଶନ କରାଯାଇଛି । କଂଗ୍ରେସ ଏବେ ଦିଲ୍ଲୀରେ ନିର୍ଦ୍ଧାରିତ ଧାରଣାସ୍ଥଳ ଜନ୍ତର-ମନ୍ତରରେ ଧାରଣା ଦେଉଛି । ଏହାପୂର୍ବରୁ ଦଳ ତରଫରୁ କେନ୍ଦ୍ରର ନୂଆ ସୈନ୍ୟ ଭର୍ତ୍ତି ଯୋଜନା ଅଗ୍ନିପଥ ବିରୋଧରେ ରବିବାର ଜନ୍ତର-ମନ୍ତରରେ ବିରୋଧ ପ୍ରଦର୍ଶନ କରାଯାଇଥିଲା । ତେବେ ଅଗ୍ନୀପଥ ଯୋଜନାକୁ ନେଇ ଦେଶରେ ଅନେକ ସ୍ଥାନରେ ବିରୋଧ ପ୍ରଦର୍ଶନ କରାଯାଉଛି । ସୋମବାର ଭାରତ ବନ୍ଦ ଡାକରା ମଧ୍ୟ ଦିଆଯାଇଛି ।
ଏତତ୍ ବ୍ୟତୀତ, ଦଳର ବରିଷ୍ଠ ନେତା ଏବଂ ପୂର୍ବତନ କେନ୍ଦ୍ରମନ୍ତ୍ରୀ ଜୟରାମ ରମେଶ ଟ୍ବିଟ୍ କରି କହିଛନ୍ତି କି, ଦେଶ ସାରା ଏକ ଲକ୍ଷ କଂଗ୍ରେସ କର୍ମୀ ଅଗ୍ନିପଥ ଯୋଜନା ବିରୋଧରେ ଶାନ୍ତିପୂର୍ଣ୍ଣ ବିକ୍ଷୋଭ ପ୍ରଦର୍ଶନ କରିବେ। ସେହିଭଳି କଂଗ୍ରେସର ଏକ ପ୍ରତିନିଧି ମଣ୍ଡଳ ସନ୍ଧ୍ୟାରେ ରାଷ୍ଟ୍ରପତିଙ୍କୁ ବି ଭେଟିବାର କାର୍ଯ୍ୟକ୍ରମ ରହିଛି। ରାଷ୍ଟ୍ରପତିଙ୍କୁ ଭେଟି କଂଗ୍ରେସ ନେତାମାନେ ଦେଶର ଭାବନାକୁ ତାଙ୍କ ସାମ୍ନାରେ ରଖିବେ ବୋଲି କହିଛନ୍ତି।
