ମୁମ୍ବାଇରେ ଆତଙ୍କ ରଚିବା ପାଇଁ ପୁଣି ପାକିସ୍ତାନରୁ ମେସେଜ୍ । ଏକ ଅଜଣା ନମ୍ବରରୁ ଆସୁଛି ମେସେଜ୍ । ଯେଉଁ ନମ୍ବରରୁ ମେସେଜ ଆସୁଛି, ତାହା ପାକିସ୍ତାନର ବୋଲି ଜଣାପଡିଛି । ଏହି ନମ୍ବରରୁ ସିଧାସଳଖ ଭାବେ ମୁମ୍ବାଇ ପୋଲିସର କଣ୍ଟୋଲ ରୁମକୁ ମେସେଜ କରାଯାଇଥିବା ଜଣା ପଡ଼ିଛି । ଏଥିରେ କୁହାଯାଇଛି ଯଦି ନମ୍ବରର ଲୋକେସନ୍ ଟ୍ରେସ କରାଯିବ, ତେବେ ତାହା ଭାରତ ବାହାରର ବୋଲି ଦେଖାଇବ । କିନ୍ତୁ ବିଧ୍ୱଂସ ମୁମ୍ବାଇରେ ଘଟିବ ବୋଲି କୁହାଯାଇଛି ।
ସେପଟେ ଆହୁରି ବିସ୍ଫୋରକ ବାର୍ତ୍ତା ପଠାଇଛି ସନ୍ଦିଗ୍ଧ । ଯେଉଁ ହମଲା ବା ଅଘଟଣ ମୁମ୍ବାଇରେ ଘଟିବ ସେଥିରେ ଖୋଦ ଭାରତର ଲୋକ ହିଁ ରହିବେ । ୬ ଜଣ ଭାରତୀୟଙ୍କ ଦ୍ୱାରା ଏହି ଅଘଟଣ ଘଟାଯିବ । ମେସେଜ କରିଥିବା ସନ୍ଦିଗ୍ଧ ପାକିସ୍ତାନ ହୋଇଥିବା ନେଇ ସୂଚନା ଦେଇଛି । ୨୬-୧୧ ଆତଙ୍କବାଦୀ ହମଲାକୁ ଉଲ୍ଲେଖ କରିବା ସହ ଉଦୟପୁର ହତ୍ୟାକାଣ୍ଡ ଏବଂ ସିନ୍ଧୁ ମୁସେୱାଲା ହତ୍ୟା ବିଷୟରେ ମଧ୍ୟ ସୂଚନା ଦେଇଛି ସନ୍ଦିଗ୍ଧ । ଏହି ଘଟଣାକୁ ନେଇ ସୂଚନା ଦେଇଛନ୍ତି ମୁମ୍ବାଇ ପୋଲିସ କମିଶନର । ଖୋଦ ପୋଲିସ କଣ୍ଟ୍ରୋଲ ରୁମ ନମ୍ବରକୁ ମେସେଜ ଆସିଥିବାରୁ ଘଟଣାକୁ ଗୁରୁତର ସହ ନେଇଛି ମୁମ୍ବାଇ ପୋଲିସ । ଏନେଇ ATS ଏବଂ କ୍ରାଇମବ୍ରାଞ୍ଚର ତଦନ୍ତ ସହାୟତା ଲୋଡାଯିବ ବୋଲି ସୂଚନା ଦେଇଛନ୍ତି ମୁମ୍ବାଇ ପୋଲିସ କମିଶନର ।
