ଭୁବନେଶ୍ୱର:ବଲିଉଡର କିଙ୍ଗ ଶାହରୁଖ ଖାନଙ୍କ ପ୍ରଶଂସକମାନେ ତାଙ୍କ ଘର ବାହାରେ ସବୁବେଳେ ଠିଆ ହୋଇଥିବା ନଜର ଆସନ୍ତି। କିନ୍ତୁ ଏଥର କାନ୍ଥ ଉପରକୁ ଡେଇଁ ଶାହରୁଖ ଖାନଙ୍କ ଘରେ ୨ ଜଣ ଲୋକ ପ୍ରବେଶ କରିଥିଲେ। ତେବେ ସମୟକ୍ରମେ ପୋଲିସ ଉଭୟ ଅଜ୍ଞାତ ଲୋକଙ୍କୁ ଧରି ପଚରାଉଚରା କରୁଛି। ସୂଚନାନୁସାରେ, ଶାହାରୁଖ ଖାନଙ୍କ ‘ମନ୍ନତ’ରେ ପ୍ରବେଶ କରିବା ପରେ ଏହି ଉଭୟ ବ୍ୟକ୍ତି ବଙ୍ଗଳାର ତୃତୀୟ ମହଲାରେ ମଧ୍ୟ ପହଞ୍ଚିଥିଲେ। ତା’ପରେ ସୁରକ୍ଷାକର୍ମୀମାନେ ଉଭୟଙ୍କୁ ଦେଖି ଧରିଥିଲେ। ଏହା ପରେ ଉଭୟ ଯୁବକଙ୍କୁ ପୋଲିସ ହସ୍ତାନ୍ତର କରାଯାଇଥିଲା।
ପୋଲିସ ପଚରାଉଚରାରୁ ଜଣାପଡିଛି ଯେ ଉଭୟ ଯୁବକ ଗୁଜରାଟର ସୁରଟରୁ ଆସିଛନ୍ତି ଏବଂ ଶାହରୁଖ ଖାନଙ୍କ ପ୍ରଶଂସକ ଅଟନ୍ତି। ଯୁବକଙ୍କ ବୟସ ୨୦ ରୁ ୨୫ ବର୍ଷ , ଉଭୟ କହିଥିଲେ ଯେ ସେମାନେ ଶାହାରୁଖ ଖାନଙ୍କୁ ଭେଟିବାକୁ ଚାହୁଁଥିଲେ। ପୋଲିସ ଏହି ଘଟଣାର ଅନୁସନ୍ଧାନ କରୁଛି ଏବଂ ଯୁବକଙ୍କ ବିରୋଧରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ସୂଚନାନୁସାରେ, ଯେତେବେଳେ ଏହି ଦୁଇ ଯୁବକ ମନ୍ନତରେ ଶାହରୁଖ ଖାନଙ୍କ ଘରେ ପ୍ରବେଶ କରିଥିଲେ, ସେତେବେଳେ ଅଭିନେତା ଘରେ ନଥିଲେ। ଶାହରୁଖ ଖାନଙ୍କ ବିଷୟରେ କହିବାକୁ ଗଲେ ସେ ବର୍ତ୍ତମାନ ତାଙ୍କ ଚଳଚ୍ଚିତ୍ର ‘ପଠାନ’ର ସଫଳତାକୁ ଉପଭୋଗ କରୁଛନ୍ତି। ଏହି ଚଳଚ୍ଚିତ୍ର ସାରା ବିଶ୍ୱରେ ୧୦୦୦ କୋଟିରୁ ଅଧିକ ବ୍ୟବସାୟ କରିଛି।
ଏହି ଚଳଚ୍ଚିତ୍ର ମାଧ୍ୟମରେ ଶାହରୁଖ ଖାନ ୪ ବର୍ଷ ପରେ ବଡ ପରଦାରେ ପ୍ରତ୍ୟାବର୍ତ୍ତନ କରିଛନ୍ତି। ପ୍ରଶଂସକମାନେ ଏହି ଫିଲ୍ମରେ ଶାହରୁଖ ଖାନଙ୍କ ସମ୍ପୂର୍ଣ୍ଣ ଅଲଗା ଅବତାର ଦେଖିବାକୁ ପାଇଥିଲେ। ଆଗାମୀ ସମୟରେ ପାଇପଲାଇନରେ ଶାହରୁଖ ଖାନଙ୍କର ଅନେକ ଚଳଚ୍ଚିତ୍ର ରହିଛି, ଯେଉଁଥିରେ ଫିଲ୍ମ ‘ଜୱାନ’ ମଧ୍ୟ ରହିଛି।
