ମହାରାଷ୍ଟ୍ର : ଭାରତ ଉପରେ ହେଉଛି ସାଇବର ଆକ୍ରମଣ । ପାକିସ୍ତାନ ସମେତ ଏକାଧିକ ଦେଶରୁ ସାଇବର ଆକ୍ରମଣ କରାଯାଇଛି । ବିଶେଷକରି ପହଲଗାମରେ ଆତଙ୍କବାଦୀ ଆକ୍ରମଣ ଅର୍ଥାତ୍ ଏପ୍ରିଲ ୨୨ ପରେ ସାଇବର ଆକ୍ରମଣ ଯଥେଷ୍ଟ ବୃଦ୍ଧି ପାଇଛି । ଏ ସମ୍ପର୍କରେ ମହାରାଷ୍ଟ୍ର ସାଇବର ବିଭାଗର ଅତିରିକ୍ତ ପୋଲିସ ମହାନିର୍ଦ୍ଦେଶକ ଯଶସ୍ୱୀ ଯାଦବ କହିଛନ୍ତି, “ପହଲଗାମ ଆକ୍ରମଣ ପରେ, ଭାରତ ଉପରେ ୧୦ ଲକ୍ଷରୁ ଅଧିକ ସାଇବର ଆକ୍ରମଣ ହୋଇଛି ।”
ସେ ଆହୁରି କହିଛନ୍ତି ଯେ, ଏହି ଆକ୍ରମଣଗୁଡ଼ିକ ପାକିସ୍ତାନ, ମଧ୍ୟ ଏସିଆ, ଇଣ୍ଡୋନେସିଆ ଏବଂ ମରକ୍କୋରୁ ଭାରତୀୟ ୱେବସାଇଟ୍ ଏବଂ ପୋର୍ଟାଲକୁ ଟାର୍ଗେଟ କରି କରାଯାଇଥିଲା । ଅନେକ ହ୍ୟାକିଂ ଗୋଷ୍ଠୀ ନିଜକୁ ଇସଲାମିକ ଗୋଷ୍ଠୀ ବୋଲି ଦାବି କରିଛନ୍ତି, ଏବଂ ଏହା ସମ୍ଭବତଃ ଏକ ସାଇବର ଯୁଦ୍ଧ ହୋଇପାରେ । ତଥାପି, ସେ କହିଛନ୍ତି – ରାଜ୍ୟ ପୋଲିସର ସାଇବର ଅପରାଧ ତଦନ୍ତ ଶାଖା ଦ୍ୱାରା ଏହି ଆକ୍ରମଣଗୁଡ଼ିକ ମଧ୍ୟରୁ ଅନେକକୁ ବନ୍ଦ କରାଯାଇଛି । ବର୍ତ୍ତମାନ ଭାରତ ପାକିସ୍ତାନ ସମେତ ଆତଙ୍କବାଦ ଉପରେ କଠୋର ଆଭିମୁଖ୍ୟ ଗ୍ରହଣ କରୁଥିବାବେଳେ ଏହାକୁ ନେଇ ସାଇବର ଯୁଦ୍ଧର ସମ୍ଭାବନା କଥା ମଧ୍ୟ ଉଠୁଛି ।
