ୱାସିଂଟନ ୨୩/ ଜୁଲାଇ : ୧୯୯୩ ମସିହାରେ ଡୋନାଲ୍ଡ ଟ୍ରମ୍ପଙ୍କ ଦ୍ୱିତୀୟ ବିବାହ ଉତ୍ସବରେ ଯୌନ ଅପରାଧୀ ଏବଂ ବିବାଦିତ ଆର୍ଥିକ ବ୍ୟବସାୟୀ ଜେଫ୍ରି ଏପଷ୍ଟାଇନଙ୍କ ଉପସ୍ଥିତି ବିଷୟରେ ନୂତନ ଫଟୋ ଏବଂ ଭିଡିଓ ମାଧ୍ୟମରେ ପ୍ରକାଶ ପାଇଛି। ଏହି ଫଟୋଗୁଡ଼ିକୁ ସିଏନଏନର କେଫାଇଲ୍ ବିଭାଗ ମାଧ୍ୟମରେ ସାର୍ବଜନୀନ କରାଯାଇଛି, ଯେଉଁଥିରେ ଦୁଇ ଜଣଙ୍କ ମଧ୍ୟରେ ପରିଚୟ ଏବଂ ସାମାନ୍ୟ ସମ୍ପର୍କ ରହିଥିବା ପ୍ରମାଣ ମିଳୁଛି। ଏହି ତଥ୍ୟ ପ୍ରକାଶ ପାସାଥିରେ ଟ୍ରମ୍ପଙ୍କ ଏପଷ୍ଟାଇନ ସହିତ ଦୂରତା ରଖିବା ଚେଷ୍ଟା ଓ ଦାବିରେ ପ୍ରଶ୍ନ ଉଠିଛି। ଟ୍ରମ୍ପଙ୍କୁ ୯୦ ଦଶକର ଅନେକ ଘଟଣାରେ ଏପଷ୍ଟାଇନ ସହ ଏକାଠି ଦେଖିବାକୁ ମିଳିଥିଲା ପାମ୍ ବିଚ୍ ଠାରୁ ନ୍ୟୁୟର୍କ ପର୍ଯ୍ୟନ୍ତ। ଏହା ସହିତ ୨୦୦୨ ମସିହାରେ ଟ୍ରମ୍ପ ଏପଷ୍ଟାଇନଙ୍କୁ “ଚମତ୍କାର ବ୍ୟକ୍ତି” ବୋଲି ବର୍ଣ୍ଣନା କରିଥିଲେ, ଯାହା ଏବେ ତାଙ୍କ ପୂର୍ବବତୀ ମତବ୍ୟକୁ ଅସ୍ତିର କରୁଛି। ଯଦିଓ ଟ୍ରମ୍ପଙ୍କ ଉପରେ ଏପଷ୍ଟାଇନ ସମ୍ପର୍କରେ କୌଣସି ଅପରାଧିକ ଅଭିଯୋଗ ଲଗାଯାଇ ନାହିଁ, ତେବେ ଏହି ଭିଡିଓ ଏବଂ ଫଟୋଗୁଡ଼ିକ ତାଙ୍କ ପୂର୍ବବର୍ତ୍ତୀ ସମ୍ପର୍କ ଉପରେ ନୂତନ ଆଲୋକ ପକାଇଛି। ଏହି ଘଟଣା ପ୍ରକାଶରେ ଟ୍ରମ୍ପ ପକ୍ଷରୁ ପ୍ରତିକ୍ରିୟା ଆସିଛି, ସେ ସିଏନଏନକୁ “ମିଥ୍ୟା ଖବର” ବୋଲି ଅଭିଯୋଗ କରିଥିଲେ। ହ୍ୱାଇଟ୍ ହାଉସର ପୁର୍ବତନ ମୁଖପାତ୍ର ଷ୍ଟିଭେନ୍ ଚେଉଙ୍ଗ ଏହି ଫଟୋଗୁଡ଼ିକୁ “ଘୃଣ୍ୟ ଅନୁମାନ” ପାଇଁ ବ୍ୟବହୃତ ହେଉଥିବା ଦାବି କରି ଟ୍ରମ୍ପଙ୍କ ପକ୍ଷରେ ଅନୁଷ୍ଠାନିକ ବ୍ୟାଖ୍ୟା ଦେଇଛନ୍ତି। ତେବେ ଏହି ତଥ୍ୟଗୁଡ଼ିକ ଏପଷ୍ଟାଇନ ଫାଇଲ ପୁନଃ ତଦନ୍ତ ପରିପ୍ରେକ୍ଷୀରେ ଏବଂ ଆମେରିକା ନ୍ୟାୟ ବିଭାଗ ଉପରେ ବଢୁଥିବା ଚାପ ମଧ୍ୟରେ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହୋଇପଡ଼ିଛି।
