ବାଙ୍ଗାଲୋର: କର୍ଣ୍ଣାଟକ ମୁଖ୍ୟମନ୍ତ୍ରୀ ବାସଭରାଜ ବୋମ୍ମାଇଙ୍କ ଏକ ଫଟୋ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଯେଉଁଥିରେ ସେ ଅତ୍ୟନ୍ତ ଭାବପ୍ରବଣ ହୋଇ କାନ୍ଦୁଥିବାର ନଜର ଆସିଛନ୍ତି । ଫଟୋରେ ସେ ନିଜ ଆଖିରୁ ଲୁହ ପୋଛୁଥିବାର ଦେଖିବାକୁ ମିଳିଥିଲା । କୁହାଯାଉଛି ଯେ ଯେତେବେଳେ ସେ ଏକ ଫିଲ୍ମ ଦେଖିବା ପରେ ସିନେମା ହଲ ବାହାରକୁ ଆସିଥିଲେ, ସେ ଭୋ ଭୋ ହୋଇ କାନ୍ଦି ପକାଇଥିଲେ । ଚର୍ଚ୍ଚା ହେଉଛି ଯେ ଫିଲ୍ମ ଦେଖିବା ପରେ ତାଙ୍କର ନିଜ ପ୍ରିୟ କୁକୁର କଥା ମନେ ପଡିଯାଇଥିଲା । ବାସ୍ତବରେ, କର୍ଣ୍ଣାଟକ ମୁଖ୍ୟମନ୍ତ୍ରୀ ବାସଭରାଜ ବୋମ୍ମାଇ ଫିଲ୍ମ ‘୭୭୭ ଚାର୍ଲି’ ଦେଖିଥିଲେ । ଏହି ଚଳଚ୍ଚିତ୍ରଟି କୁକୁର ଏବଂ ଏହାର ମାଲିକଙ୍କ ସମ୍ପର୍କ ବିଷୟରେ କହିଥାଏ । ମୁଖ୍ୟମନ୍ତ୍ରୀ ବୋମ୍ମାଇ ଫିଲ୍ମକୁ ବହୁତ ପସନ୍ଦ କରିଥିଲେ । ବୋମ୍ମାଇ ଜଣେ କୁକୁର ପ୍ରେମୀ। ଗତ ବର୍ଷ ତାଙ୍କ ପୋଷା କୁକୁରର ଦେହାନ୍ତ ହେବା ପରେ ତାଙ୍କର ହୃଦୟ ଭାଙ୍ଗି ପଡିଥିଲା ଓ ସେ କାନ୍ଦିବାକୁ ଲାଗିଥିଲେ। ଏହି ଚଳଚ୍ଚିତ୍ର ଦେଖିବା ପରେ ସେ ନିଜ କୁକୁରକୁ ମନେ ପକାଇ ଭାବପ୍ରବଣ ହୋଇଯାଇଥିଲେ । ଫିଲ୍ମ ଦେଖିବା ପରେ ବୋମ୍ମାଇ କହିଛନ୍ତି ଯେ କୁକୁରଙ୍କ ବିଷୟରେ ପୂର୍ବରୁ ଚଳଚ୍ଚିତ୍ର ନିର୍ମାଣ କରାଯାଇଛି କିନ୍ତୁ ଏହି ଚଳଚ୍ଚିତ୍ରରେ ମଣିଷ ସହ ପୋଷା କୁକୁରର ଭାବନା ଓ ସମ୍ପର୍କକୁ ଅତି ନିଖୁଣ ଭାବରେ ଦର୍ଶାଯାଇଛି । ସେ କହିଛନ୍ତି ଯେ କୁକୁର ନିଜର ଭାବନାକୁ ଆଖିରେ ପ୍ରକାଶ କରେ।
