ମୋବାଇଲ୍ ନ୍ୟୁଜ୍ ବ୍ୟୁରୋ: ଆରମ୍ଭ ହେଉ ହେଉ ବନ୍ଦ ହେଲା ସଂସଦର ମୌସୁମୀ ଅଧିବେସନ । ବିରୋଧୀଙ୍କ ହଟ୍ଟଗୋଳରେ ମୁଲତବୀ ହୋଇଛି ଉଭୟ ଗୃହ । ଆଜିଠାରୁ ଆରମ୍ଭ ହୋଇଛି ସଂସଦର ମୌସୁମୀ ଅଧିବେସନ ତେବେ ପୂର୍ବରୁ କଂଗ୍ରେସ ଦେଇଥିବା ସୂଚନା ଅନୁଯାୟୀ ଆଜି ଗୃହରେ ବିରୋଧୀମାନେ ମଣିପୁର ହିଂସା ମମଲା ଉଠାଇ ହଟ୍ଟଗୋଳ କରିଥିବା ଦେଖାଯାଇଛି ।
ବିରୋଧୀଙ୍କ ହଟ୍ଟଗୋଳ କାରଣରୁ ପ୍ରଥମେ ଦିନ ୧୨ଟା ପର୍ଯ୍ୟନ୍ତ ରାଜ୍ୟସଭାକୁ ମୁଲତବୀ କରାଯାଇଥିଲା ବେଳେ ଅପରାହ୍ନ ୨ଟା ପର୍ଯ୍ୟନ୍ତ ରାଜ୍ୟ ସଭା ମୁଲତବୀ ରଖାଯାଇଥିଲା । ସେପଟେ ମଣିପୁରରେ ଘଟିଥିବା ଅମାନୁଷିକ ଘଟଣାକୁ ନେଇ ନିଜର ପ୍ରତିକ୍ରିୟା ରଖିଛନ୍ତି ପ୍ରଧାନମନ୍ତ୍ରୀ ମୋଦି । ସେ କହିଛନ୍ତି ରାଜନୀତିର ଊର୍ଦ୍ଧ୍ୱରେ ରହି ନାରୀଙ୍କୁ ସମ୍ମାନ ଦେବା ଉଚିତ୍ । ମରିପୁରରେ ମହିଳାଙ୍କ ସହ ଯାହା ହୋଇଛି ସେଥିରେ କ୍ରୋଧ ଓ ପୀଡ଼ାରେ ମୋର ହୃଦୟ ଜର୍ଜରିତ ହୋଇଯାଉଛି । ଏଥି ପାଇଁ ପୂରା ଦେଶ ଆଜି ଲଜ୍ଜିତ । ଏହି ଘଟଣାକୁ ସଭ୍ୟ ସମାଜ କେବେ ବି ଗ୍ରହଣ କରିବ ନାହିଁ । ମୁଁ ଦେଶବାସୀଙ୍କୁ କଥା ଦେଉଛି କୌଣସି ଦୋଷୀଙ୍କୁ ଛଡ଼ା ଯିବନି । ଆଇନ୍ ଠିକ୍ ନିଷ୍ପତ୍ତି ନେବ।
ଏଠାରେ ଉଲ୍ଲେଖଯୋଗ୍ୟ ଯେ ମଣିପୁରରେ ଦୀର୍ଘ ଦିନ ଧରି ହିଂସା ଲାଗି ରହିଛି। ଏପରିକି ନାରୀଙ୍କୁ ଉଲଗ୍ନ କରି ସର୍ବସାଧାରଣରେ ଚଲାଇବା ଭଳି ହୀନ କାର୍ଯ୍ୟକୁ ନେଇ ସାରା ଦେଶରେ ଗଭୀର ଆଲୋଡ଼ନ ସୃଷ୍ଟି ହୋଇଛି।
