ଭୁବନେଶ୍ଵର: ରାଜଧାନୀ ଭୁବନେଶ୍ଵରର ଆଖପାଖ ଅଞ୍ଚଳରେ ବାର୍ଡ ଫ୍ଲୁ ବ୍ୟାପିବା ଆରମ୍ଭ ହୋଇଛି । ଏନେଇ ବାର୍ଡ ଫ୍ଲୁକୁ ନେଇ ଭୁବନେଶ୍ଵର ମେୟର ସୁଲୋଚନା ଦାସଙ୍କ ପ୍ରତିକ୍ରିୟା । ସେ କହିଛନ୍ତି ଯେ, ଭୁବନେଶ୍ଵର ଆଖପାଖ ଅଞ୍ଚଳରେ ବାର୍ଡ ଫ୍ଲୁ ସଂକ୍ରମଣ ଦେଖାଦେଇଛି।
ରାଜଧାନୀବାସୀଙ୍କ ସ୍ଵାସ୍ଥ୍ୟକୁ ନଜରରେ ରଖି ନିର୍ଦ୍ଦେଶନାମା ଜାରି ହୋଇଛି । ବାହାରୁ କୌଣସି କୁକୁଡ଼ା ନଆଣିବା ପାଇଁ ନିର୍ଦ୍ଦେଶ ଦିଆଯାଇଛି । ବାହାରୁ କୁକୁଡ଼ା ନକିଣିବାକୁ ଦୋକାନୀମାନଙ୍କୁ ଅନୁରୋଧ କରାଯାଇଛି ।
ଯେଉଁ ଦୋକାନୀମାନେ ନିର୍ଦ୍ଦେଶକୁ ଅବମାନନା କରିବେ ତାଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯିବ । ସୂଚନାନୁଯାୟୀ, ସଂପ୍ରତି ବାର୍ଡ-ଫ୍ଲୁ ବ୍ୟାପୁଥିବା ବେଳେ ରାଜଧାନୀରେ ଥିବା କୁକୁଡ଼ା ମାଂସ ବିକ୍ରେତାମାନେ ସଚେତନ ହେବା ଆବଶ୍ୟକ ।
ଯେଉଁ ଅଞ୍ଚଳରେ ସଂକ୍ରମଣ ବ୍ୟାପୁଛି ସେଠାରୁ କୁକୁଡ଼ା ଆଣି ବିକ୍ରି କରିବାକୁ ମନା କରିଛି ଭୁବନେଶ୍ୱର ମହାନଗର ନିଗମ । ଯେଉଁ କୁକୁଡ଼ା ବା ପକ୍ଷୀ ଅସ୍ୱାଭାବିକ ଭାବେ ଅସୁସ୍ଥ ହୋଇ ପଡିଯାଇଥିବl କିମ୍ବା ମରିଥିବା ଦେଖିବାକୁ ମିଳିଲେ ନିକଟସ୍ଥ ପ୍ରାଣୀ ଚିକିତ୍ସା କେନ୍ଦ୍ର କିମ୍ବା ୱାର୍ଡ ଅଫିସ୍ରେ ଜଣାଇବାକୁ ବିଏମସି କମିଶନର ରାଜେଶ ପ୍ରଭାକର ପାଟିଲ ଏକ ପ୍ରେସ ବିଜ୍ଞପ୍ତିରେ ଜଣାଇଛନ୍ତି ।
ମଲା ପକ୍ଷୀଙ୍କୁ ଏଣେତେଣେ ନ ଫୋପାଡ଼ି ନିର୍ଦ୍ଦିଷ୍ଟ ସ୍ଥାନରେ ପୋତିବା ସହ ସେଠାରେ ବ୍ଲିଚିଂ ପକାନ୍ତୁ । ଏହି ସମୟରେ ମାକ୍ସ ଓ ଗ୍ଲୋବ୍ସ ପିନ୍ଧିବାକୁ କୁହାଯାଇଛି । ଯଦି ସଂକ୍ରମିତ କୁକୁଡ଼ା ସଂସ୍ପର୍ଶରେ ଆସି କୌଣସି ବ୍ୟକ୍ତି ବା ଶିଶୁଙ୍କୁ ଜ୍ୱର, ଛିଙ୍କ, କାଶ ଲାଗିରହୁଛି ତେବେ ଡାକ୍ତରଙ୍କ ସହ ଯୋଗାଯୋଗ କରିବାକୁ ରାଜେଶ ପାଟିଲ ନିବେଦନ କରିଛନ୍ତି ।
ବିଏମ୍ସିର ଗାଇଡ୍ଲାଇନ୍ ମାନିବା ସହ ବାର୍ଡ-ଫ୍ଲୁ ମୁକ୍ତ କରିବା ପାଇଁ ସହାୟକ ହୁଅନ୍ତୁ ବୋଲି ବିଏମ୍ସି ପକ୍ଷରୁ କୁହାଯାଇଛି । ଅନ୍ୟପଟେ ବିଏମ୍ସି ଅଧିକାରୀ ବା ସାଇନ୍ ଟିମ୍ ପରିଦର୍ଶନରେ ଯିବା ସମୟରେ ଠିକ୍ ତଥ୍ୟ ପ୍ରଦାନ କରି ଭୁବନେଶ୍ବରକୁ ବାର୍ଡ ଫ୍ଲୁ ମୁକ୍ତ କରିବାରେ ସକ୍ରିୟ ସହଯୋଗ କରିବା ପାଇଁ ବିଏମ୍ସି ପକ୍ଷରୁ ନିବେଦନ କରାଯାଇଛି।
