ନୂଆଦିଲ୍ଲୀ: ବିଶ୍ୱରେ ଏମପକ୍ସ ସଂକ୍ରମଣ ଦ୍ରୁତ ଗତିରେ ବ୍ୟାପିବାରେ ଲାଗିଛି । ବିଦେଶ ଫେରନ୍ତା ଯୁବକ ଭାରତରେ ମଙ୍କିପକ୍ସ ବା ଏମ୍ପକ୍ସ ଭୂତାଣୁ ଦ୍ୱାରା ସଂକ୍ରମିତ ସନ୍ଦିଗ୍ଧ ରୋଗୀ ଚିହ୍ନଟ । ଏମ୍ ପକ୍ସ ସଂକ୍ରମିତ ଚିହ୍ନଟ ହେବା ପରେ ତାଙ୍କୁ ଏବେ ହସ୍ପିଟାଲର ଆଇସୋଲେସନ୍ ୱାର୍ଡରେ ରଖାଯାଇଛି । ଅନ୍ୟପକ୍ଷେ ଭାରତରେ ଏମ୍ପକ୍ସ ଭୂତାଣୁର ସ୍ଥିତି ସ୍ପଷ୍ଟ ହେବା ପରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ସତର୍କ ହୋଇ ଉଠିଛି।
କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି ଯେ ଚିହ୍ନଟ ମଙ୍କିପକ୍ସ ସଂକ୍ରମିତ ଭାବେ ଚିହ୍ନଟ ହୋଇଥିବା ଯୁବକ ଜଣକ ନିକଟରେ ଏକ ମଙ୍କିପକ୍ସ ସଂକ୍ରମିତ ଦେଶକୁ ଯାତ୍ରା କରି ଭାରତ ପ୍ରତ୍ୟାବର୍ତ୍ତନ କରିଛନ୍ତି ।
ଏହି ଯୁବକଙ୍କ ଠାରେ ଦେଖାଦେଉଥିବା ଲକ୍ଷଣଗୁଡିକ ଏନ୍ସିଡିସି ଦ୍ୱାରା ପୂର୍ବରୁ ଉଲ୍ଲେଖ କରାଯାଇଥିବା ମଙ୍କିପକ୍ସ ସଂକ୍ରମିତଙ୍କ ଲକ୍ଷଣ ସହିତ ସମାନ ରହିଛି । ସତର୍କତାମୂଳକ ପଦକ୍ଷେପ ସ୍ୱରୂପ ତାଙ୍କୁ ଏବେ ଆଇସୋଲେସନ୍ରେ ରଖାଯାଇଛି । ଏଥିସହ ସନ୍ଦିଗ୍ଧ ରୋଗୀଙ୍କ ନମୁନା ପରୀକ୍ଷା ମଧ୍ୟ କରାଯାଉଛି । ନମୁନା ପରୀକ୍ଷା ରିପୋର୍ଟ ଆସିବା ପରେ ଏମପକ୍ସ ସଂକ୍ରମଣ ସମ୍ପର୍କରେ ସ୍ପଷ୍ଟ ହୋଇପାରିବ । ତେବେ ବର୍ତ୍ତମାନ ସୁଦ୍ଧା ଏନେଇ କୌଣସି ଅନାବଶ୍ୟକ ଚିନ୍ତାର କୌଣସି କାରଣ ନାହିଁ । ସନ୍ଦିଗ୍ଧ ଯୁବକ ଜଣକ ଏବେ ହସ୍ପିଟାଲରେ ଅଛନ୍ତି l ନିମୟିତ ଭାବେ ତାଙ୍କ ସ୍ୱାସ୍ଥ୍ୟାକୁ ଯାଞ୍ଚ୍ କରାଯାଇ ତାଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ରହିଥିବା କଥା ମନ୍ତ୍ରଣାଳୟ ଦର୍ଶାଇଛି । ଆଫ୍ରିକା ପରେ ୟୁରୋପୀୟ ଦେଶଗୁଡ଼ିକରେ ମଧ୍ୟ ଏହି ଭୂତାଣୁ ସଂକ୍ରମିତ ହେଉଛି।
ଗତ ଜୁଲାଇରେ ଏମ୍ ପକ୍ସର ନୂଆ ଭାରିଆଣ୍ଟ ‘କ୍ଲେଡ୍ ୧ବି’ ଚିହ୍ନଟ ହେବା ପରେ ଅଗଷ୍ଟ ୧୪ରେ ମଙ୍କିପକ୍ସକୁ ବିଶ୍ୱ ସ୍ୱାସ୍ଥ୍ୟ ସଂଗଠନ (ହୁ) ପକ୍ଷରୁ ହେଲଥ୍ ଏମର୍ଜେନ୍ସି ଘୋଷଣା କରାଯାଇଥିଲା। ବର୍ତ୍ତମାନ ସୁଦ୍ଧା ପ୍ରାୟ ୧୭ଟି ଦେଶକୁ ମଙ୍କିପକ୍ସ ଭୂତାଣୁ ସଂକ୍ରମିତ ହୋଇସାରିଛି । ଆଫ୍ରିକୀୟ ରାଷ୍ଟ୍ର ବୁରୁଣ୍ଡି, କେନିଆ, ରୁୱାଣ୍ଡା ଏବଂ ଉଗାଣ୍ଡାରେ ମଙ୍କିପକ୍ସର ନୂଆ ଷ୍ଟ୍ରେନରେ ଆକ୍ରାନ୍ତ ଚିହ୍ନଟ ହୋଇଛନ୍ତି ।
ହୁ’ ବହୁପୂର୍ବରୁ ହିଁ ଏହି ଭୂତାଣୁଜନିିତ ସଂକ୍ରମଣ ସମ୍ପର୍କରେ ସତର୍କ ସୂଚନା ଜାରି କରିସାରିଛି । ପ୍ରକାଶ, ଏମ୍ ପକ୍ସ ଭୂତାଣୁ ଉଭୟ ବୟସ୍କ ଓ ଶିଶୁଙ୍କୁ ସଂକ୍ରମିତ କରୁଛି । ଏହି ଭୂତାଣୁ ଦ୍ୱାରା ମୃତକଙ୍କ ସଂଖ୍ୟା ମଧ୍ୟ ବଢ଼ିବାରେ ଲାଗିଛି । ଏହା ଏକ ବାୟୁବାହିତ ଭୂତାଣୁ ହୋଇଥିବା ବେଳେ ଏହାକୁ ପ୍ରତିହତ କରିବା କଷ୍ଟକର ହୋଇପଡୁଛି । ଏମ୍ ପକ୍ସ ଏକ ଆତ୍ମ-ସୀମିତ ଭାଇରାଲ୍ ସଂକ୍ରମଣ ।
ଏହା ଦ୍ୱାରା ସଂକ୍ରମିତ ବ୍ୟକ୍ତିବିଶେଷଙ୍କ ଠାରେ ଦେଖିବାକୁ ମିଳୁଥିବା ଅତି ସାଧାରଣ ଲକ୍ଷଣ ମଧ୍ୟରେ ଜ୍ୱର, ମୁଣ୍ଡବିନ୍ଧା, ମାଂସପେଶୀ ଯନ୍ତ୍ରଣା, ପିଠି ଯନ୍ତ୍ରଣା, କମ୍ ଶକ୍ତି, ଏବଂ ଶରୀରରେ ଛୋଟବଡ଼ ଫୁଲିଯାଇଥିବା ଲସିକା ଗ୍ରନ୍ଥି ଦେଖିବାକୁ ମିଳିଥାଏ । ତେବେ ଏହା ବ୍ୟକ୍ତିର ଶରୀରରେ ପ୍ରାୟ ତିନି ସପ୍ତାହ ପର୍ଯ୍ୟନ୍ତ ରହିଥାଏ ।
ଅନ୍ୟପଟେ ସଂକ୍ରମିତ ଶିଶୁ ଏବଂ ବୟସ୍କ ବ୍ୟକ୍ତିଙ୍କ ପାଇଁ ଏହା ପ୍ରାଣଘାତୀ ସାବ୍ୟସ୍ତ ହେଉଥିବା ମଧ୍ୟ ଦେଖିବାକୁ ମିଳୁଛି । ୨୦୨୨ରେ ପ୍ରଥମ ଥର ପାଇଁ ଭାରତରେ ଏହି ଭୂତାଣୁଜନିତ ସଂକ୍ରମଣ ମାମଲା ଦେଖିବାକୁ ମିଳିଥିଲା । ଏହି ସମୟରେ ଦେଶରେ ୩୦ଟି ଏମ୍ପକ୍ସ ସଂକ୍ରମିତ ଚିହ୍ନଟ ହୋଇଥିଲେ ଏବଂ ଜଣେ ବ୍ୟକ୍ତି ଏଥିରେ ପ୍ରାଣ ହରାଇଥିଲେ।
